لا مفر منه

السلام عليكم و رحمة الله وبركاته

امبارح "بونظير" اغتيلت فى باكستان الله أعلم هى أغتيلت على ايد مين...........بس فى الاخر ماتت

يعنى حياتها انتهت.......


انهارده كذا واحد ماتوا فى اندونيسيا بسبب الفيضانات اللى حصلت فيها..........

يعنى برده ماتوا....يعنى حياتهم انتهت....


و برده انهارده سقط كذا شهيد فى قطاع غزة.......

يعنى برده ماتوا ........يعنى حياتهم انتهت


يعنى خلاص مافيش رجعه........لو كانوا عملوا حاجه غلط او زعلوا حد ما ينفعش يصلحوا اللى هما عملوه......

لو كان عندهم امتحانات ....خلاص مش هيمتحنوا.......لأنهم راحوا لإمتحان أكبر........

إنا لله و إنا إليه راجعون

الناس عماله تموت من حوالينا و يسقطوا واحد ورا التانى........

و احنا مش واخدين بالنا.....مش حاسين ان البساط عمال يتسحب من تحت رجلينا حبه حبه و خطوه خطوه.......هنلاقى نفسنا واقعين جمبهم......


و الله اعلم وقعتنا هتكون زى بونظير.............و لا زى الغرقا فى الفيضان........ولا زى الشهداء فى فلسطين.......

ربنا يجعلنا جميعا من الشهداء, آمين يا رب العالمين.......

و لاتنسوا موتانا من صالح دعائكم.....

.................حبة خواطر

و إن تعدوا نعمة الله لا تحصوها

من كام يوم و انا فى ميدان لبنان رايحة الجامعه, لقيت شلة بنات و ولاد واقفين و عمالين يهزروا و يجروا ورا بعض, قلت عادى حبة عيال هبل خارجين من المدرسه و مروحين..........

بس اكتشفت انهم بيهزروا من غير صوت,يعنى صوتهم مش مسموعين,يعنى ناس بتجرى و بتهأهأ من غير صوت.........

و جت الصدمه جامده جدا عليا, و اكتشفت انهم من مدرسة صم و بكم!!!!!!!!!!!!

معرفش ليه بس انا دايما بشوف عادى ناس كتير مابيتكلموش بس مش بتففرق معايا,انما دول لما شوفتهم وقفت متسمره فى مكانى فتره طويله جدا.......

يمكن علشان هما من نفس جيلى؟؟؟؟؟ معرفش بس انا اتصدمت جدا و وصلت لمرحلة انى اعيط.......
بجد ساعتها حسيت بنعمة الكلام و السمع دى جدا.....و احنا بجد مش مدركين اهميتها و مش مدركين مدى غلاوتها عندنا......

يعنى الناس دى محرومه من انها تسمع صوتها و محرومه من انها تسمع قرأن و محرومه من انها تسمع اى حاجه......

بجد بجد الحمد لله الذى عافانا......

ملعون ابو اللى يعمل فى الناس كده

برده فى نفس اليوم قررت انى هركب مينى باص جامعة جيزه.......
و المينى باص ده انا لما بركبه بيبقى عادى فى بنى ادمين طبيعيين راكبينه.......

إلا اليوم ده........

اول موقف:
راجل راكب من قبل ما اركب انا و بعد ما جه عند ناهيا ....قال للراجل " و النبى اركنلى على جمب لحسن انا نسيت حاجه هرجع اجيبها" و نزل من غير ما يدفع........

انا قلت ايه؟؟؟ ان بعض الظن اثم , و يمكن يكون الراجل نسى فعلا,رغم ان شكله مايطمنش......

تانى موقف:

ست كبيره و عجوزه جدا ,يعنى يجيلها حوالى سبعين خمسه و سبعين سنه,......

و اول ما جينا عند مترو البحوث لقيتها جاتلها حالة هستريا, وعمال تلطم و تصوت و تقول يا ولاد منديلى ضاع منى ,يا لهوى منديل ابيض بصوا تحت رجليكوا يا ولاد لحسن انا مش شايفه.........ده انا مسافره يا ولاد,حد يساعدنى........

فى الاول الموضوع دخل عليا و صعبت عليا جدا لانها ست عجوزه و لوحدها,و قلت استحاله تكون بتمثل.......ده حتى عيب دى ست كبيره و اكيد مش هتقلل من احترامها......

المهم هى صعبت على واحد قاعد ورا,فقالها مش انتى يا حجه مسافره الفيوم قالتله أأه,قالها طيب خلاص هاخدك معايا.......

اول ما الراجل قالها كده, قلبت الموضوع و قعدت تقول ده انا مسافره و فى و الراجل عيان حد يلحقنى دول كانوا 120 جنيه,هعمل ايه يا ربى ده الراجل عيان,حد يساعدنى يا ولاد......

ساعتها بقى كنت ابصم بالعشره انها بتمثل, وكنت ناويه اتوسطلها تاخد جايزه اوسكار..........

بس قعدت افكر,ايه اللى مخلى الناس تعمل كده.......

هل هو الفقر؟؟ظو لاهى هواية؟؟؟؟؟؟و لا هما مايعرفوش انهم بيعملوا حاجه غلط؟؟؟؟؟

انا مش عارفه .......بس انا يومها رحت الجامعه مكتئبه و الناس صعبانين عليا......

سبحان الخالق

و برده فى نفس اليوم و انا مروحة عالمحور..........بعيدا عن كل الحوادث اللى كانت عليه و كمية الاسعافات اللى واقفه,شوفت منظر حلو قوى......لأ بجد كان حلو قوى قوى قوى.......

القمر كان على شمالى ...و كان يومها هلال لسه ما بقاش كامل.......انا ساعتها اتبسطت قوى, معرفش ليه........بس انا اول مابشوف القمر بتبسط.....

كان سبحان الله روعه روعه فوق الوصف........

السما كانت زرقا جدا....و النجوم منوره فيها قوى.و القمر اللهم بارك وهمى و خيالى........

و فعلا مافقتش غير لما بقيت عند هايبر وان, المنظر كان فعلا يسحر,رهيب وهمى ماشاء الله.....

و قعدت اتخيل, عارفين
dream works?????

بيبقى الفاصل بتاعها او المقدمه بتاعت اى فيلم ليها بيبقى ولد قاعد على الهلال و بيصطاد.....ز

اهه انا بقى نفسى و منى عينى انى اقعد على القمر و اصطاد,رغم انى عمرى ما اتمنين انى اصطاد عادى.......

و بقعد اتخيل انى لما هدخل الجنة, غير انى هلعب ماتش كوره مع الصحابة, انى هقعد اصطاد من على القمر......

الهم و الغم اللى مش هيخلص غير كمان سنتين و نص ان شاء الله

جينا بقى لوقت الزنقه و حدش شايف قدامه......

انا دلوقتى ربنا يستر عليا, و الحق اخلص المناهج اللى عندى......

انا فعلا ايقنت انهارده ان المذاكره دى ممله جدا جدا جدا جدا جدا ,فوق ما تتخيلوا...........

اصل انا بعيد عنكوا بذاككر ماده ربنا يحفظنا و يحفظكوا منها......." نقود و بنوك, و تجاره خارجيه" يعنى الملل متشكل فى شكل كلام و منهج......

رغم انى و الله بحب الاقتصاد جدا و كنت بحب احضر محاضراتها جدا.....

بس مش عارفه الحقيقه ليه دايما المذاكره بتكون ارخم من الفهم و تلقى المعلومات......

حاجه مملة.......يا سلام لو كل المواد اللى عندى اتقلبت تخطيط و تسويق.........

هتقبى حباة مثالية.....

اييييييييه دنيا!!!!!!!

يلا كفايه كده عليكوا.....

جزاكم الله خيرا على الاستماع:)

لسه الدنيا بخير

السلام عليكم و رحمة الله وبركاته

كالعاده عندى اكتئاب ايام الامتحانات و لازم فى يوم اعيط فيه علشان اخلص كل الاكتئاب اللى عندى و استعيد طاقتى و نشاطى و حماسى للمذاكره ,بس المشكله ان اليوم ده لسه ماجاش..........
يا رب بقى يجى و يخلصنا.....

و فى ظل تلك الحاله المغيمه,فى ناس لما بشوفهم او بسمع عنهم بحس و الله ان لسه الدنيا بخير..............لأ و بخير قوى.

كنت لسه امبارح شايفه واحد من الناس اللى فعلا بتحسسنى ان لسه الدنيا....
اشخاص دايما مبتسمين رغم المحن و الصعاب اللى هما فيها.......

رغم ان هما بيكونوا بيتخبطوا فى جوانب الحياة و لكنهم مستمرين فى التفاؤل و التبسم......
و لسه برده كنت سامعه عن واحد برده من الناس اللى بتدينى امل فى الحياه و بيوضحلى مدى اهميه و كبر دورى فى الحياة....و ان شاء الله هشوفوه عما قريب.....

ده ما يمنعش ان فى ناس اول مابشوفهم بيزيد اكتئابى رغم انى ممكن اكون بحبهم بس هما بيزودوا اكتئابى و خلاص.....

فى ناس بقى فعلا لما بشوفهم بحس انى لسه المشوار قدامى طوييييييييييييييييييل و انا لسه بقول يا هادى........

و احيانا بيحسسونى بالفشل و احيانا بيدونى امل........

الناس دول او يمكن هما مش ناس ممكن يكونوا ملايكه....و الله الواحد ابتدا يشك فى أمرهم ,هل هما ملايكه ولا بنى ادميين زيينا زيهم من لحم و دم....؟؟؟؟؟

اكيد طبعا انتوا عرفتوا هما مين؟؟؟؟؟؟

خالد مشعل

و اسماعيل هنيه

نفسى فعلا اشوف مين اللى ربى الناس دول ..؟؟؟؟؟؟؟؟

فعلا عمل ايه علشان يطلعوا كده؟؟؟؟؟؟

يطلعوا مملؤين بالعزه و العظمه و الفخر بدينهم ووطنهم و لغتهم........

عايزه اعرف فعلا كان ايه اللى بيحصل لهم و هما صغييرين علشان يطلعوا كده........

كان فى مره واحده,بتقول انا لو تخيلت المدينه الفاضله على ارض الواقع ما بتخيلهاش غير فى غزه..!!!!!!!!!

فعلا فعلا بجد لسه الدنيا بخير.....

هى دى الناس اللى تدى امل فى الحياه.......يخلونا نتعب و نتبهدل علشان على الاقل نبقى زيهم........

و الله لسه الدنيا بخير...

قرار مصيرى

السلام عليكم و رحمة الله و بركاته

انا بقالى فترة عايزه اكتب عن الموضوع ده,بس للاسف الشديد ماكنتش بلحق.........

الناس بتستخف ببعض القرارات و بيخدوها بسرعه جدا رغم ان القرارات دى مصيريه و صعب جدا ان اى حد ياخدها غير بعد تفكير عميق جدا......

و المشكله انهم مابيكتشفوف نتيجه الاختيارات السريعه غير بعد اتخاذ القرار بفترة ممكن تكون طويله و ممكن تكون قصيره و فى ناس ربنا بيكرمها و بتاخد بالها و هى بتاخد القرار......

و نفس الناس اللى حصل لها مشاكل بسبب القرارات السريعه هى اللى بتنصح بأننا ناخد القرارات برده بسرعه......

يعنى مابيتعلموش.....
و القرارات دى بتبقى مصيريه فعلا ...........يعنى بتحدد احنا هنروح يمين ولا هنروح شمال ولا هنقف فى مكاننا..

مش عارفه هل ده عدم فهم و وعى من عندهم ولا هما عارفين و مش واخدين بالهم ولا هما ايه بالظبط مش عارفه.....

و فى بعضا من الناس بياخد القرارات علشان يتماشى مع التيار.....

يعنى بيلاقى الناس رايحه يمين يروح يمين......

زى عندنا مثال مبسط و هو الثانويه و دخول الجامعه......

تلاقى حد جاب مجموع كبير و بيلاقى ان الناس كلها بتشكر فى كلية سياسه و اقتصاد و بتحفى علشان تعرف تدخلها و هو اصلا مايعرفش الكلية دى بيحصل فيها ايه ولا الحياة هتبقى عامله ازاى بعد مايدخلها و ازاى هيعيش مع الناس الجديده دى من غير مايكون عارفهم......

بس للأسف علشان الناس بتقول انها حلوه فهو دخلها........و كان من الممكن لو كان دخل معهد تجفيف الرنجا كان هيبقى ناجح اكتر و حياته افضل............و ممكن برده لو ماكانش دخل جامعه خالص كان هيبقى ارحم له و افيد له......

بس هى الناس بتحب تضيف كتير.......

اتمنى انكوا تكونوا فهمتوا اللى انا بقوله.......

و الله انا حاسه بيكوا و انتوا بتقرأوا كلامى ..........ززانا عن نفسى أحيانا مابفهمش انا بقول ايه.......

بس يلا ماعلينا........


دعواتكوا بقى لحسن انا اكتشفت ان امتحاناتى كمان 26 يوم و انا الحمد لله لا أفقه شيئا فى اى حاجه......

ربنا يسترها علينا......

انا عارفه ان شاء الله ان 26 يوم دول كفايه جدا و هيتبقى كمان ايام,بس المشكله انى عندى الدنيا زحمه قوى فى الكام يوم اللى جايين دول,ربنا يستر......

دعواتكوا....

و جزاكم على الإستماع :)

قمة البرائه

السلام عليكم يا اهل التدوين الكرام........

اللى كان يقرأ الموضوع بتاعى اللى فات يحس انى بكره كل حاجه فى الدنيا بس يلا........

المهم انا لاحظت حاجه غريبه جدا.....ز


ان الاطفال دول فعلا قمة البرائه فى الدنيا......

زهنهم صافى و عمرهم ما بيسيؤا الظن فى حد أبدا مهما حصل......

و حتى لما بيفقدوا الثقه فى حد بمجرد انه يعاملهم كويس بيثقوا فيه تانى.......

و بيحبوا الناس كلها و بيموتوا فى اللى بيبتسم ليهم.......


انا اساس ماكنتش بحب الاطفال نهائيا.......

و كنت بتخنق لما ببقى فى مكان و فيه اطفال......

رغم انى اصغر اخواتى بس كان عندى ولاد اخوات كتير.....

و سبحان مغير الاحوال.......

انا دلوقتى مابقتش احب اتعامل مع حد كبير و بقيت افضل انى اتعامل مع الاطفال......

انا فى مجموعه من الاطفال هما اللى خلونى احب الاطفال.......و ابقى مبسوطه و انا معاهم....

بس لانى لقيت انهم بيفهموا اللى قدامهم صح و بيثقوا فيه جدا......و بيحبوا اللى يحبهم و بيسامحوا اللى مش بيحبهم....

الاطفال دول فعلا نعمه كبيره جدا انا ماكنتش حاسه بيها غير لما قارنت بينهم و بين الكبار......

و مشاعرهم صادقه.....و مجرد انى ابتسم لهم بيبتسموا و بيفرحوا جدا و يا سلاااااااااااام لو شكرت فيهم قدام حد بتبقى بالنسبه لهم حاجه كبيره جدا و بتتملكه ثقه بالنفس عاليه جدا.....


و هما عباره عن حاجه احنا بنشكلها.........و بفرح اوى لما بلاقيهم بيساعدوا الناس.......

و دى بقى اكتر حاجه تفرق مابين الكبار و مابين الصغيرين.....

لان الاطفال عمرهم مابيستنوا إطراء من حد و هما بيتحركوا مابيبقوش واخدين بالهم هو فى حد شايفهم ولا لأ......

إنما بقى الكبار خد عندك ككككككككككككككككل أمراض القلوب...


رغم انك ممكن تلاقى اطفال متشردين و بلطجيه و لسانه اربعه متر........بس برده لما تبص فى عينيهم و الله هتلاقوا حاجه غريبه

انا ماعرفش هى ايه بس فعلا حاجه غريبه عيون مليانه برائه مافيهاش اى نوع من انواع الخداع.......


و لما بيعيطوا بيقطعوا القلب ......

و لما بيفرحوا بيفرحوا اللى حواليهم......

و لما بيفرحوا بيروحوا يفرحوا مع اللى حواليهم مش بيقعدوا يفرحوا لوحدهم لانهم خايفين من الحسد......


بس حبة كلام كانوا واقفين فى زورى ولازم أقولهم لانى مخنوووووووووقه.....


و جزاكم على الاستماع :)



علشان بس ما اغمكوش ادى لينك فيه صور بيبيهات ظريفه قوى

.........مهارة ترجمة المواقف,و التدخل فى حياة الأخرين

السلام عليكم.....

كيف أحوالكم و أحوال أولادكم؟؟؟؟

المهم,
انا اكتشفت اكتشاف خطير جدا......

اكتشفت ان كل الناس بتحب تحشر نفسها فى اللى مالهاش فيه...

هتقولولى ده فى ناس و ناس....

لأ ده كككل الناس بتحب تحشر نفسها فى اللى مالهاش فيه....

يعنى ممكن ارجع فى كلامى و اقول مش كلهم بس 90% من الناس بيبقوا كده....

و انا إحصائياتى صح مش زى ناس تقول 99.9%احنا برده ناس عندنا ضمير....

و اتضح لى انى كنت عايشه بقالى 18 سنه فى حلم ان الدنيا وردى و ان كل الناس طيبه و بتتعامل معايا بحسن نيه...

و اكتشفت انى انا اللى بتعامل معاهم بحسن نيه...

و مش اكتشفت و بس لأ انا صدمت صدمه عمرى فى ناس ماكنتش عمرى اتخيل انهم كده....

الناس دى انا كنت فكراهم ناس " ملتزمه" و طيبه و بيعاملوا الناس بخلق حسن,بس طلع انى كنت بحلم احلام وهميه,حاجه كده من نسج خيالى...

و طلع ان الناس دى عندها حب و عشق ترجمة المواقف....

يعنى اول ما اقول قدامهم حاجه يقعدوا يلفوا و يدوروا بالكلام ده فى عقلهم لحد مايلاقوا له تفسير زى الزفت....

و تلاقى مره واحده الناس كلها زعلانه منك و كله عمال يقول انك بتغلط بقالك كتير ....

و يا سلام لوحد فكر انه مثلا لا سمح الله انه يبص فى اتجاه حد و يتكلم و هو اصلا مش شايف الحد ده ....يقوم بقى الحد ده ايه؟؟؟؟يسبيك فى حالك ؟؟لأ طبعا

لازم يعكر عليك صفو حياتك و يقرفك و يطلع لك القطط الفاطسه فى كل تصرفاتك و تلاقيه قلب عليك 360 درجه و تبقى انت المنبوذ وسط كل الناس....

و اكتشفت اكتشاف التانى ان العقل مش بالسن....

يعنى انا كنت فاكره ان الناس اللى فى الجامعه هما بس اللى بيتهايفوا

فقلت مش مشكله عيال و بيتعلموا

لأ ده طلع ناس كبار و سنهم كبير بيتهايفوا و يقولوا كلام و يترجموا مواقف و يتكلموا عليك و تلاقى ان الدنيا كلها بتتناقش فى مشكلتك مع فلان الفلانى و انت اصلا ما تعرفش انك عامل مشكله...

بجد بقى انا قرفت و زهقت من الناس دى ....

و نفسى فعلا احزفهم من على وجه الأرض....

لانهم لا يستحقوا الحياه فى وسط مجتمع انسانى تحفه الأخلاق فى التعامل....

بجد حاجه ممله انى اشوف الناس دول و هما بيضحكوا فى وشى و بيسألوا عليها و هما لسه من خمس دقايق كانوا مشحورينى بالكلام....

بجد بجد حاجه وحشه.....و فعلا انا مش لاقيالها وصف غير وحشه...

و انا على فكره كلمه وحشه دى بتعنى لى معانى كثيره ,ممكن يكون حد من اللى بيقرأ يحس انها كلمه عاديه....

بس انا لما بقول وحشه معناها انى وصلت خلاص للأخر....

و حسبى الله و نعم الوكيل..

..................النظافه من الإيمان و القذاره من

اكمل النقاط بمعرفتك

ليه الناس و هى ماشيه فى الشارع بنشوفها بترمى الورق و العلب على الارض؟؟؟

يا ترى هما بيرموها لانهم مش لاقين اماكن مخصصه لرميها؟؟؟

و لا هما مكسلين انهم يروحوا لحد المكان المخصص ليها؟؟؟؟

و لاهما مش عارفين انهم المفروض انهم يرموا فى اماكنها؟؟؟

او يمكن هما مش شايفينها؟؟؟؟؟

ولا يمكن مافيش اصلا اماكن مخصصه لرميها؟؟؟


اسئله كتيره جدا تدور فى ذهنى عندما ارى رجلا مهندما يلبس بدله كامله و كرافته "شيك" و الاقيه بيرمى ورقه من شباك عربيته او علبه سجاير او او او...

او الاقى واحده "شيك" ماشيه مع بنتها "الشيك" و ماشيين يقزقزوا لب و يرموا قشره على الارض,او يرموا المناديل اللى معاهم على الارض....

او الاقى طفل ماشى فى الشارع مع والدته و فى اى حاجه عايز يرميها و مامته تقوله ارميها جمبك يا حبيبى....

و نعم التربيه...

انا ببقى نفسى اعرف,هما فعلا ما بيبقوش عارفين ان دى حاجه غلط؟؟ولا بيبقوا عارقين و مطنشين؟؟ولا هما اتربوا على انهم يرموا الحاجات على الارض فى الشارع ,انما فى البيت مايصح نرمى حاجه على الارض....

و الاقى عربيه ماشيه و عليها بادج الجامعه,يعنى اللى راكبها ده دكتور جامعه محترم,و تلاقيه اول حاجه بيعملها انه يرمى ورق او مناديل من الشباك......

و الظاهره دى انتشرت فى وسط الملتزمين....

رغم انهم المفروض انهم "ملتزمين" يعنى ناس فاهمه صح.....

يعنى المفروض انهم بيميطوا الاذى عن الطريق و يعطوا الطريق حقه....

ده انا لو بس فكرت مجرد انى افكر انى ارمى ورقه لبانه على الارض ببقى حاسه انى برتكب جريمه .....

انا فى واحده ربنا يكرمها هى اللى خلتنى اكتب الموضوع ده,كل ما ابقى معاها فى مكان لازم تسيب بصمتها فى المكان ده و ترمى حاجه كانت معاها....

و المهم ان الناس ترجع تقولك الشوارع مش نضيفه و عمال النضافه دول بيعملوا ايه فى حياتهم....

و الجناين العامه شكلها يرعب.....

و المصيبه انهم بيبقوا هما السبب.....

و فى مصر قوى البهدله اكتر من قوى التنظيف......

فاتقوا الله فى الناس و فى بلدنا اللى خلاص وصلت لمرحل ما بعد الصفر..........يعنى بقت بالنيجاتيف.

بس و جزاكم :)

سيحل عليكم غضب الالهاااااااااااااااااااا

سيحل عليكم غضب الالهه,و سوف تسخطون الى قرده مسلسله.....
عليكم اللعنه ايها القرده الخاسئين المفسدون فى الارض....
يا شفلحه المبلتح لقد رأيت صبيا لم يبعث بالرساله الالكترونيه التى وجب عليه ارسالها الى خمسه اشخاص.
انهم يتبعون دينا جديداا, هى بنا لنقتلهمممممممممممممممم.......
استغفر الله و اتوب اليه,يا رب عذب من لن يبعث بتلك الرساله الى خمسه اشخاص و احشره فى اسفل عليين,و احشره مع الظلمه الخائنين...



كفايه كده عليكوا.....
بس انا واثقه ان كل الناس اللى بتبعت الرسايل و الايميلات دى بيبقى هو ده الكلام اللى بيدور فى خلدهم.....
و اظن انه بيبقى ده هدفهم فى الحياه....
و يا عينى فى ناس كتير بيبقوا طيبين و على نياتهم و بيصدقوا و بيبعتوا الرسايل.....
انا فعلا بتنرفز جدا لما الاقى حد بعت لى الرسايل اللى بيبقى مكتوب فيها انك هيحصلك حاجه وحشه قوى لو مابعتش الرساله دى لعشره غيرك...

بتبقى حاجه مستفزه جدا جدا جدا...
و يا سلام لما تبقى من حد انا ابقى متخيله انهم عاقلين, بتبقى صدمه العمر....
يا جماعه الكلام ده كان ايام ابو جهل و ابو لهب....
خلاص انسوا الخرافات و الاساطير دى بقى و ارحمونا الله يكرمكوا.....
فيا جماعه يا ريت لو فى حد من اللى هيقرأ الكلام و بيبعت الرسايل دى او بيعرف حد بيبعتها يا ريت يبقى ينبههم ان الحاجات دى مرجعيتها الهبل و التخلف و الرجعيه و كده هما بيرجعونا لأيام الجاهليه و بيثبتوا كلام اعداء الاسلام علينا....

لأ وهنلاقى بقى دلوقتى العيار زايد حبتين, اصل رمضان قرب و ده شهر التقوى و الرحمه..

فلازم نكسف الجرعه و نزود الرسايل دى علشان الناس تلحق تتوب لربها و تستغفر لمعاصيها و ترجع الى دينها بعد ما رجعت فى كلمها و ارتدت....

يا جماعه

الدين يسر وليس عسر....

الله يكرمكوا ماتشوهوش صورتنا قدام الناس....

ارحمونا بقى كفايه كده
خلاص انا مش قادره اشوف اى حاجه كده تانى....

كرهتونا فى الدنيا....

دى حاجه مش ممكن ,

ممكن نكتب فى الرسايل دى كلام ظريف بدل مانجيب للناس الغلابه رعب و نخليهم يتشلوا من الرعب و هما فى مكانهم...

ممكن مثلا نقلهم الذكر مثلا و ثوابه....
او نقول على ايه او سوره قرأنيه ليها ثواب كبير و (و نكتب الثواب بتاعها)...
يعنى نخلى عندنا حبه مفهوميه و ذكاء....

معلش انا اسفه انى طولت عليكو,بس فعلا الموضوع مهم....

و جزاكم عالاستماع.:)

اعتذار

انا فعلا اسفه جدا جد اجدا على انى ماكتبتش بقالى شهر فى المدونه....
و انا عارفه ان ده تهريج, بس انا والله ماكنتش فاضيه....
فأنا بعتذر لأأى حد كان دخل المدونه على اساس انه يقرأ حاجه و لقا فيها حاجات قديمه فأنا بعتذر من اعماق قلبى.......
و الله فعلا انا كان عندى حاجات كتيره عايزه اكتب عنها بس مالحقتش...
فان شاء الله هكتب كل حاجه انا عايزاها....

و كمان انتوا عارفين الدراسيه جايه و الواحد مابيحلالوش الكتابه الا ايام الدراسه, فبإذن الله هيبقى فى كتابات كتيره.

:)

يا صباح التفاهه

و انا بعمل سيرش علشان الاقى صوره احطها فى الموضوع ده لقيت الصوره دى.......

بس بجد حرقت دمى و التفاهه نسبتها بقت عاليه قوى عند المصريين....

يعنى ايه الاهلى فوق الجميع؟؟؟

معلش اصلى فهمى على قدى و مش فهماها قوى....

يعنى الاهلى اهم من مستقبلنا كشباب و بنبدأ حياتنا...؟؟؟؟

الاهلى اهم من دعوتنا و رسالتنا.....؟؟؟؟

الاهلى اهم من الاقصى و العراق و الشيشان و المسلمين اللى بيخلصوا فى كل مكان...؟؟؟

حسبى الله و نعم الوكيل فى الهبل...

انا اللى خلانى اكتب الموضوع ده انه كان تقريبا يوم الاحد او السبت كان فى ماتش كره قدم بتاع العراق....

انا مش عارفه هو كان مع مين....

بس واضح انه كان مع فريق كبير....

المهم عالصبح كده لقينا الناس عماله تصوت و تهلل و فرحانه جدا.....

بما ان اكتوبر خلاص اتحولت و بقت" البصره",فاحنا عندنا هنا تلات ارباع اكتوبر عراقيين...

المهم احنا ماكناش فاهمين ايه اللى بيحصل....

فقلنا ايه؟؟ الهبل كتير و كل واحد يبقى فى حاله....

انما الموضع يوصل لدرجه ان الشوارع تبقى واقفه تماما لان العراقيين التافهين اللى هما اصلا فى نظرى هربوا من مواجهه الاحتلال فى بلادهم وقفوا يهللوا و يهيصوا فى الشوارع و يسدوا الشوارع لانهم فرحانين....

فده بيتسمى فى نظرى تفاهه و هيافه و فضى و عدم احترام البلد اللى استقبلتهم و الناس اللى احترموهم و اعتبروهم من اهلهم....

يعنى انا واثقه ميه فى الميه ان لو العراقيين انتصروا على احتلالهم مش هيفرحوا بالمنظر ده....

ولا هيعملوا كل اللى هما عملوه ده....

و اصلا عمرهم ما هيعرفوا ينتصروا طالما لسه فى ناس بالمنظر ده و فى ناس بتكتب الاهلى فوق الجميع.....

فعلا فعلا فعلا تفاهه و هروب من الواقع اللى هما فيه.....

انا اسفه جدا على الاطاله....

و جزاكم على الاستماع

.......فتياتنا و حجاب الموضه

منقول من مجله الزهور

بقلم:رابعه محمد حربى-السعوديه -المدينه المنوره

لماذا نتنازل دائما فى كل شئ,و عن كل شئ؟؟؟؟

فى العشرينيات من هذ القرن تقريبا,كانت النساء فى ارض الكنانه يرتدين اللاملابس.و كان ظهور محجبه فى احد شوارع القاهره يعتبر امرا مثيرا للذهول,بل إن مجرد ارتداء امرأه لثوب يغطى ركبتيها كان مدعاه لأن يهمزها الناس و يلمزونها,و يندهشون من عجيب صنيعها...

و مرت الايام النحسات,ثم بدأت بعدها دعوات الصالحين,و المصلحين من ابناء هذا البلد تؤتى اكلها,و استطاعت جذوه الايمان التى اشعلوها فى القلوب ان تقتلع جذور العرى و التبذل,و بذأ الحجاب ينتشر,و لكن ثمه اعينا لم تذق للراحه طعما بل دأبت تخطط و تخطط لتتمكن من وأد تلك الصحوه..

بدأت تلك الفئه الباغيه تعلن سعادتها بعوده المرأه الى الحجاب , و انها "اثباتا لحسن النوايا" سوف تقدم تشكيلات مختلفه من الحجاب المناسب لكل المناسبات ,و الموافق لكل المواقف....

و ظهرت لاول مره فى مصر مراكز مختصه بملابس المحجبات,استطاعت و بكل سهوله استقطاب الكثيرات و الكثيرات,معظمهن من الفتيات الباحثات عن كل ما هو جديد.....

و فى تلك المراكز بدأتطوير شكل الحجاب,و لكن ببطء و هدوء شديدين,و ذلك تبعا للقاعده الذهبيه لأعداء الفضيله
اى ببطء و لكن النتائج اكيده " slow but sure "


بدأ التطوير ينال من الخمار,فأصبح مطرزا ثم مثقبا من اسفل ثم ذا الوان فاقعه,ثم مثلثا ثم مربعا فمستطيلا,ثم تقلص المستطيل ليصبح قطعه قماش اذا سترت مقدمه الشرع كشفت مؤخرته, و العكس صحيح, و انتهينا من الخمار و جاء دور الجلباب.....

كانت البدايه بتضيبقه قليلا ثم كثيرا,و لما تم التضيق وجب ان تفتح فيه فتحتان جانبيتان لتسهيل الحركه,و لكن ثمه خطبا جللا,فما دامت هناك فتحتان,وجب ان تلبي تحته "بنطال" -من باب الستر و الحشمه- و بما ان هذا البنطال واسع و فضفاض فقد تم رفع الجلباب "سابقا" شبرا عن الكعبين,ثم زاد الشبر الى ذراع,و الذراع الى باع....

و بما ان الشكل الاخير ليس جلبابا فقد اطلق عليه اسم جديد و هو "التونيك".....ز

و اريد ان اسأل من استبدلت بحجابها الساتر ذلك التونيك غير الساتر, اذا كان لبسك للحجاب طاعه لله فلماذا لا تصب تلك الطاعه فى مرضاه الله؟؟؟؟

هل هذا الشكل يرضى الله؟؟؟؟؟
إن الله تعالى يقول: "يدنين عليهن من جلابيبهن"..ز
و يقلو: "و ليضربن بخمرهن على جيوبهن" ........ز
و الونيك لا يحقق هاتين الايتين بأى شكل من الاشكال.....

أيهما اهم لديك؟رضا الله ام رضا لاناس؟؟؟؟
إذا كنت لا تدرين فهذ مصيبه,و اذا كان رضا الناس اهم فالمصيبه اعظم, و إذا كان معلوما ان رضا الناس غايه لا تبلغ,فلم ترهقين نفسك؟؟؟

انتهت

عندما قرأت تلك الكلمات قررت انى يجب على ان ارسلها لكل العالم و هذه هى طريقتى الوحيده لكى اوصل اى شئ للعالم....

فأرجو من كل من ستقرأ هذا الموضوع ان تراجع نفسها, ونحن لسنا افضل منكن بكثير.....
و كل من سيقرأ الموضوع ان يجعل اخته او زوجته او امه تقرأه او يحدثها عنه.....

و جزاكم على الاستماع....

......و عالأصل دور

كلمه بنسمعها كتيييييييييير جدا و فضلت فتره طويله مش فهماها....
يعنى مش فاهمه هما قاصدين بيها ايه...

بس بصراحه بعد اللى شوفته و سمعته على مدار السنه اللى فاتت خلانى افهمها و فعلا عالاصل ادور....

بصوا ممكن ناس اللى هيقرأوا الموضوع ده ما يقتنعوش باللى انا كتباه و كمان ممكن يقولوا عليها جاهله و راجعيه و متحجره...

انا هتكلم فى نقطتين:

1- الناس اللى عندهم مستوى الثقافه منحدر و مستوى الفن منحدر

2- الناس اللى مستوى الثقافه عندهم عالى "كما يقال" و مستوى الفن عندهم برده من منحدر


اول نقطه الناس اللى بيقولوا عليهم بلدى و مطربين شعبيين...

دول الحقيقه انا بعذرهم على مستوى الفن "اذا سمى بفن" اللى هما بيطلعوه...

لأنهم غالبا بيبقوا نشأوا فى بيئه المعلمه فضه و المعلم ابو رجل مسلوخه....

فدول ليهم الحق انهم يطلعوا اغانى بتقول العنب و البلح و الخيار و كل انواع الفاكهه و ليهم حق انهم يغنوا للحمير كمان...

و تلاقيهم بيحشروا الدين فى السياسه فى الحب و الهيام فى الهبل اللى فى الجبل....

انما بقى الناس "كما يقال عنهم" هاى و مستواهم الاجتماعى "مش الثقافى" عالى و متربين معرفش فين و كانوا مدارس معرفش ايه,و تلاقيهم بيغنوا اغانى و بيعملوا افلام انا لو دفعولى فلوس عمرى ما اسمعها و لا عمرى ما هشوفها....

و الحمد لله اللى يركب المواصلات لازم يتفرض عليه انه يسمعها الحمد لله مش بنشوفها كمان.....

يعنى مره سمعت اغنيه لمطربه فاضله بتحث الشباب على تحديد المصير و الاهتمام بالمستقبل بتقول ايه الست العظيمه:

بتقول حط النقط على الحروف

اللهم مبارك ده الفن ولا بلاش....
خلاص سيبكوا من ديه نيجى بقى يعينى عند الناس المعقدين اللى بيعملوا شرايط كامله يوصفوا فى نفسهم و فى جمالهم و فى كل حاجه حلوه فى حياتهم....

العالم دى فاضيه و بتفرض فضاها ده علينا....








تانى نقطه و دى الاهم و اللى بجد بجد حرقت دمى و تقريبا ضغطى على فيها.....

لقيت صاحبه مدونه هعيش و اتحدى احزانة و مدونه انا كده بيقولولى ايه ماتيجى نروح نقابه الصحفيين هناك معرفش عرض افلام المدونين و حركات من دى....

طيب ماشى يا جماعه تماما جدا....

روحنا نشوف افلام المدونين المحترمين المثقفين اللى بيؤمنوا بحريه الرأى و حريه التعبير عن الرأى و انا الحقيقه اظن انهم بيؤمنوا بالانحلال كمان...

اول فيلم ماشى تماما لحد ما مره واحده لقينا البنت اللى بتمثل جلها حاله عصبيه و قامت تعمل حاجات غريبه و مش راكبه على بعضها.....

انا اظن ان لو صاحب الفيلم او صاحبه الفيلم ده لو كانت بتراعى شعور الناس اللى قاعدين و بتحترمهم كانوا هيدوا اى انذار فى الاول ان فى حاجات ممكن الناس تعترض عليها....

بس احنا بندن فى مالطه....

طيب يا جماعه انا لازم امشى انا كده هتشل....

لالالالا خليكى بس شويه اكيد الفيلم اللى جاى هيبقى "محترم" و عليه القيمه و هنقدر نشوفه...

ادى قاعده...

نشوف الفيلم التانى المحترم الحمد لله من اول لقطتين فيه قمنا و سيبنا القاعه كلها و انا الحمد لله سيبت النقابه بحالها...


ده بقى بزمتكوا مش عدم احترام لكرامتنا و لحريه رأينا و كل الفتى اللى الناس المدونين دول بيتكلموا عنه؟؟

يعنى انا رايحه اشوف حاجه محترمه الاقى المهزله اللى حصلت فى النقابه....

و الله تقولوا عليا جايه من العصر الجاهلى او مش متفتحه او مابتفهمش فى الفن و الكلام ده كله قولوا اللى تقولوه....

بس انا اظن انه مش المفروض ان النقابه اصلا كانت تسمح بحاجات بالمنظر ده تتعرض فيها...

و كان احتراما للناس الللى قاعده ماكانش ينفع الحاجات دى تتعرض....

و انا بكل اسف ندمت اشد الندم انى ضيعت ساعتين من وقتى فى حاجه خلت تلات اربع المدونين ينزلوا من نظرى و الحقيقه اصبحت لا اثق فى أرائهم....

لأ و اللى يغيظ الناس قاعده تتفرج ولا كأن حاجه حصلت و لا كأن حاجه بتحصل...


معلش انا طولت عليكوا بس انا اسفه جدا...

و معلش برده انا اسفه انى كتابتى متلخبطه و مش راكبه على بعضها بس انا مش عارفه ارتب افكارى لانى عندى كلام كتير و مش عارفه اكتبه...

خير خير....

اتمنى ان اللى يقرأ الموضوع ده يفهم قصدى ايه...

و جزاكم...

........هاكتب لأنى عايزه كده

السلام عليكم

هكتب لأنى عايزه كده........

أه هكتب لأنى عايزه كده.....

و فيها ايه يعنى؟؟؟؟هو لازم الواحد يكون بيكتب لهدف معين....

مش قظدى انى مايبقاش عندى رساله عايزه اوصلها بس انا مش عايزه احدد هدف معين لكتاباتى....

انا عايزه اكتب لانى بحب اكتب سواء كتاباتى دى عجبت الناس او ما عجبتهمش عنها ما عجبتهم....

اخويا دايما يقولى اكتبى اللى انتى عايزه تكتبيه مش اللى الناس عايزه تقراه.....

و انا فعلا مقتنعه بده....

ايه اللى يخلينى اقعد افكر فى انا عايزه اكتب ايه....

مادام انا ماعنديش افكار مش هخترع افكار....

لو ماكانتش الكتابه نابعه من القلب و من عقل صافى عمرها ماهتبقى حلوه و مؤثره و عمرنا ماهنعرف نوصل فكرتنا لو كنا بنكتب من غير ماتكون الكتابات دى فعلا نابعه من داخلنا....

و حاجه بس احب اقولها لكل اللى هيقرأ الموضوع ده: عدد التعليقات اللى بتبقى موجوده فى اى موضوع مش مقياس لمدى اهميه الموضوع او مقياس لإعجاب الناس بالموضوع او وصول رساله الموضوع اليهم....

فى ناس عندها مزاج انها ترد فى المواضيع مش لشئ غير انها فاضيه و مش هاين عليها انها تدخل مدونه و تطلع من غير ما ترد فيها...

و يا ريت و احنا بنكتب مواضيعنا يبقى تركيزنا على الهدف من الموضوع مش هدفنا ان الناس تشوف احنا بنفهم فى ايه و يبقوا عارفين اننا فزاليك و بنفهم فى كل حاجه و مقطعين السمكه و ديلها....

و برده يا ريت نراعى حدود التعامل مابين الجنسين....

تلاقى واحد كاتب انا كان عندى صداع امبارح و تلاقى كل الناس "بنات و ولاد " داخلين يدعوله بالشفا,ما كل واحد يدعى فى سره ولا اصلا ما نكتبش حاجات شخصيه...

عشان كده انا بعترض على كتابه المواضيع الشخصيه,رغم انى كنت لسه كاتبه موضوعين شخصيين و دى غلطه و ان شاء الله مش ناويه اكررها تانى ابدا....

انا مابقولش للناس تكتب ايه و ماتكتبش ايه,كل واحد طبعا حر.....

بس انا بتشل لما ادخل تلات اربع مدونات ورا بعض و الاقيهم كلهم فيهم حاجات شخصيه ....

و اللى يغيظ اكتر تلاقى فى مدونات البنات اغلبيه اللى بيعلقوا ولاد و فى مدونات الولاد تلاقى اغلب اللى بيعلقوا بنات.....

و النبى بقى ده يتسمى ايه.؟؟؟ رخامه و لا استهبال ولا استعباط و لا ايه نظام الناس دى اصلا....

انا عارفه انى متعصبه و بكتب بطريقه مش لذيذه بس فعلا الموضوع ده ينرفز,و يقلك الانفتاح....

بلا انفتاح بلا بتاع بقى....

انا عندى افضل انى اننا نفضل منغلقين على ان يكون الانفتاح بالمنظر ده....

كنت فى مكان ما و كان الاستاذ\مينا زكرى كان بيقول شعر فى شباب الاخوان....

و كان بيحكى على انه ماكانش بيحبهم و بعد التدوين بقى يحبهم لانه اكتشف انهم شباب عادى جدا بيسمع اغانى و فى ولاد منهم بيرطبتوا بقتيات,,,,نااااااااااااااااااااااااااااعم؟؟؟؟ اغانى و فتيات؟؟؟

اللهم بارك, بقى ده يتسمى انفتاح ولا انحلال؟؟؟؟

انا كان هاين عليا ان الارض تنشق و تبلعنى و هو بيقول الكلام ده......

يعنى الحمد لله اتفضحنا و بقت الفضيحه بجلاجل و بتسمع اخر البلد.....

فاتقو الله فى نفسكوا و فى الفكر اللى انتوا شايلين اسمه.....

انا عارفه ان الموضوع كان عن حاجه فى الاول بس دخل فى مواضيع تانيه,معلش انا اسفه....

جزاكم على الاستماع...

انا نجحت....تصدقوا؟؟؟؟

انا مش مصدقه و مش متخيله ........

تخيلوا انا نجحت هههههه انا حاسه انى فى حلم و كلها خمس دقايق و هصحا منه....

اول امبارح و انا فى مكان ما بعمل عمل ما لقيت الموبيل رن نص رنه و قفل.....

فببص اشوف مين لقيت عمو ........

قلت لا اله الا الله عمو فى الوقت ده يعنى النتيجه "اصبحنا و اصبح الملك لله"

المهم كان معايا واحده صحبتى قعدت تقولى يا بنتى اتصلى بيه.......

المهم اتصلت بيه ماردش..........

ان ان ااااااااااان يعنى انا على الاقل قوى شايله ماده ولا اتنين.....

المهم لقيته بيتصل بيا......

و ادانى طريحه متينه من التهزيق قبل ما يقول النتيجه........

قلت اللللله يبقى انا شيلت ماده او جبت مقبول........

بس الحمد لله لقيته بيقولى انى جبت جيد جدا........

طبعا انا ما اقتنعتش و لحد دلوقتى مش مقتنعه......

بس هو كان بيقولى كده لانى قليت خمس درجات عن الترم اللى فات......

هو بصراحه الترم ده كنت بستعبط,كنت مقضياها انا و اسماء يعنى الحمد لله قوى و يا رب اسماء هى كمان تنجح ياااااااارب..

بس دى اول مره فى حياتى اجيب درجات عدله....

كنت طول عمرى ستين فى الميه سبعين تمانين يوم ما اتمعظم قوى....


بس الحمد لله الترمين مع بعض جيد جدا هما على الحركرك بس الحمد لله......

ربنا ييسر و فى التلات سنين اللى جايين......


يااااااااااااااااااااااارب يا مؤه انتى ورحمه تنجوا.....

قولوا امين.

حته كده فى الاخر

كان انهارده كتب كتاب اخويا........

هو مش كتب الكتاب بس هما كتبوا القسايم و الحاجات الرسميه....

و ان شاء الله يوم الجمعه هيبقى الاشهار فى مسجد الرواس...

انا فرحانه قوى...

اخويا هيتجوز......تصدقوا؟؟؟

انا مش مصدقه نفسى.......

اخويا خلاص فرحه يوم الجمعه......

يعنى هو مش الفرح الفرح,هو كتب كتاب بس.....

بس كفايه انى اشوف اخويا هو مش الكبير بس هو مابينى و مابينه اختى انى اشوفه عريس......

مش متخيله انه خلاص هيبقى رب اسره....


هههههههههه عسل قوى رب اسره دى مش لايقه عليه.....

انا فرحانه جدا و مش عارفه اكتب....

و من كتر ما انا مش متخيله انه فرح يوسف اخويا بنسى ان الفرح يوم الجمعه و لما حد بيقول قدامى كلمه فرح بسألهم فرح مين....


و الله انا فرحانه قوى......

بارك الله لهما و بارك عليهما و جمع بينهما فى خير
بارك الله لهما و بارك عليهما و جمع بينهما فى خير
بارك الله لهما و بارك عليهما و جمع بينهما فى خير

!!!!!!!!محاوله لفهم ما جرى فى غزه

السلام عليكم

طبعا كلنا عارفين المهزله بل المهازل اللى حصلت و بتحصل فى غزه...

المهم انا لقيت مقاله حلوه جدا لفهمى هويدى,و طبعا ما اتنشرتش فى جرنان الاهرام ولا عمرها هتتنشر فيه....

محاوله لفهم ما جرى فى غزه : بقلم فهمى هويدى


و الله المستعان........

!!!!!!!يبقى انت اكيد فى مصر

لما تقوم من الفجرعشان تلحق تنزل و تروح قبل الزحمه

و لما تكون شايل هم انك هتروح تقضى حاجه فى مصلحه حكوميه

يبقى انت اكيد فى مصر

لما تكون نفسك تروح فى ميعادك و تتأخر بسبب المواصلات

يبقى انت اكيد فى مصر

لما تروح المصلحه الحكوميه

بعد شحطته المواصلات

و ركوبك لخمسين الف مواصله عشان توصل للمكان اللى انت عاوز توصله

و تلاقى الموظفين مبوزين فى وشك

يبقى انت اكيد فى مصر

و لما تفكر انك تستفسر من اى حد من الموظفين على اى معلومه

و تلاقيه قلب حواجبه حداشر

و بوزه طول مترين

و هاين عليه يقوم يلطشك بالألم

يبقى انت اكيد فى مصر

لما تعطل اى حد من الموظفين عن الورد اليومى المقدس

ألا و هو الفطار

و تتبجح و ترفع الالقاب و تطلب منه انه ياخد منك الورق و يخلص مصلحتك

يبقى انت اكيد فى مصر

لما تبقى تايه فى الشارع و تسأل الناس عن الطريق

و تلاقى خمسين واحد بيوصفولك الطريق

و كل وصف يوديك فى حته

و مافيش حد راضى يقولك انا معرفش

يبقى انت اكيد فى مصر

لما يبقى موجود عربيه شرطه قدام المدرسه

علشان تمنع معاكاسات البنات و تمنع الشغب

و يقعد العساكر اللى فيها يتسلوا على البنات فى الرايحه و الجايه

يبقى انت اكيد فى مصر

لما يكون فى واحد حاكم 100 مليون مواطن لمده اربعه و عشرين سنه

و متحكم فى افكارهم و تصرفاتهم و متسلط عليهم

و كمان ابنه هيمسك بعد ما ربنا يكرمه زى ما كرم السادات

يبقى انت اكيد اكيد فى مصر

اشهد ان لا إله إلا الله

ييااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااه,كفاره...

خلصت الامتحانات؟؟؟؟الامتحانات خلصت؟؟؟؟يعنى خلاص مافيش امتحانات تانى؟؟؟؟؟

انا مش مصدقه انا حاسه انى بحلم.....

خلاص هنام و اصحى من غير ما افكر فى اى ماده,و من غير ما اقوم و انا مسروعه علشان الساعه بقت عشره الصبح وانا لسه ماذكرتش حاجه.......

انا مش مصدقه,و حاسه انى فى حلم و هفوق منه كمان تلات شهور...

هو فعلا حلم و هفوق منه كمان تلات شهور...

هفوق منه لما الاجازه تخلص....

انا مش عارفه ليه الاجازه بتخلص.....

و ماله لما نروح الجامعه و نحضر المحاضرات و نذاكر و نشوف اصحابنا و نمارس شغلنا عادى.......



بس


من غير امتحانات....

انا مستعده انى اروح الجامعه و احضر كل المحاضراتو اذاكر و امتحن كمان بس من غير نتيجه.....

انا حاسه انى كنت فى معركه و نجوت منها الحمد لله....

دى الثانويه كانت ارحم...

على الاقل لما بنجيب تقدير قليل الاهل بيقولوا اصلهم كانوا متوترين و معرفوش يحلوا كويس.....

على الاقل بتبقى مسؤليه النتيجه حد غيرنا متحملها......

انما بقى فى الجامعه الجريمه لبساك لبساك,يعنى مافيش خرم ابره ان حد يشيل عننا مسؤليه النتيجه.....

بس بجد الحمد لله....

بس و الله زعلانه ان فى سنه من حياتى خلصت..

و دى كانت سنه حلوه قوى الحمد لله....

و سنه رابعه خلاص هيمشوا و الجامعه هتفضى علينا....

بس كل حاجه ليها نهايه,و الحمد لله انها جت على قد سنه رابعه بس....


انا عارفه انى دوشتكوا بس انا بجد فرحانه قوى.....

و كان نفسى اكتب اى حاجه على ما احضر المواضيع ان شاء الله اللى هكتبها على مدار الصيف بإذن الله...

و انا اسفه جدا جدا جدا انى ماردتش ولا كتبت مواضيع جديده لانى كنت مطحونه فى الامتحانات و كنت اتحسب تبع عداد الاموات.....

و ان شاء الله ناويه اعمل تعديلات كويسه فى المدونه و يا رب تعجبكوا ان شاء الله....

و انا اسفه جدا لو كان فى حد دخل و مالاقاش موضوع جديد...

و جزاكم على الاستماع :)

الشباب المصرى....وهبل اللغه

السلام عليكم ورحمه الله وبركاته

انا بس مش عارفه ابدأ الموضوع ازاى............

انا حاسه ان العربى بتاعنا يعنى اللغه العربيه مستواها عمال ينحدر لحد ما تقريبا وصلت لمرحله الصفر.........

مش عارفه ابدأ الكلام عن الناس اللى عندها عقده الخواجه و بتحس ان الكلام بالعربى يااااااى حاجه بلدى......

و بيحسوا ان الانجليزى و الفرنساوى هما اللغات التحفه.......

يعنى انا اعرف ناس كتييييييييير لا يفقهوا شيئا فى الانجليزى و لكنهم لازم يحشروا فى كلامهم كام كلمه انجليزى كده.....

يعنى هتلاقوا كل الناس دلوقتى كلامهم لا يخلو ابدا من كام كلمه كده

"sure-ok-already-just-bye-hye-see you-take care-pink-blue-orange"

واضح ان الناس دى يا اما بتتكسف تتكلم عربى يا اما عندها عقده الخواجه يا ما شباب روش و حاسس ان اللغات التانيه حاجه حلوه و هتخليه عنتر زمانه.........

و فى كل الحالات هى مصيبه و كارثه.......

يعنى ليه الناس بتتكلم انجليزى فى وسط الكلام العربى.......

انا مش بقول ان احنا مانتعلمش لغات......

لأ ده احنا لازم نتعلم اللغات و المفروض يبقى عندنا حصيله كبيره جدا من اللغات.....

لانه ماينفعش نبقى مسلمين و عايزين ندعوا لدينا و نرفع شأن امتنا و احنا مش عارفين نتواصل مع العالم الخارجى لاننا مش فاهمين لغته......

و لما نيجى بقى عند الكلام الانجليزى المتعرب......يا سلام ده بقى كلام ولا فى الاحلام......


اولا كل الناس بتقول كلمه تيشرتات و انا عن نفسى ماعرفلهاش كلمه تانيه.....


و ناس كتيييييييير بتقول نسيف اللينك ده....."خلوا بالكوا الفاء عليها تلات نقط"

و نكبشر الفيلم ده...."نكبشر يعنى ننقل الفيلم من على الشريط الفيديو الى حاجه تانيه"

و ماشوفتش حد لحد دلوقتى بيستخدم الكمبيوتر الا و كان بيقول سى دى....

و ليه الناس تقول بلوج؟؟؟؟مالها كلمه مدونه...ما اظنش انى نقصت اى حاجه لما بقول مدونه.......

و يقولوا برده بوست....مالها كلمه موضوع؟؟؟ده احنا حتى المفروض " عرب " يعنى اسمنا على اسم لغتنا....

يعنى مايصحش اننا نتكلم بلغه غير لغتنا.......

و ليه الاهل يعلموا ولادهم انهم يقولوا بليز و ثانكيو و ميرسى.....

مالها شكرا و مالها لو سمحت.........

و ليه الناس تقول هاى ....انا مش بقول يقولوا السلام عليكم" لحسن ده سلام الارهابيين " يقولوا مثلا صباح الخير....ولا حتى يقولوا مساء الخير,بس يتكلموا بلغتنا....

انا مش قصدى من الموضوع ده انى اذكر امثله......

انا بس عايزه الناس تحس بقيمه اللغه بتاعتنا,احنا لازم ننمى لغتنا....مش نكتفى اننا بنتكلم "عامى" و نقول احنا عرب.....

احنا اصلا اللى احنا بنتكلمه ده مش العربى الصحيح,ده مجرد كلام عدى من جمب اللغه العربيه فتشبه بها......

يعنى مره كنت بتكلم مع دكتور فاضل على كليه دار العلوم فبقوله:دى كليه رخمه و صعبه على الفاضى و مالهاش اى لزمه......

طبعا ادانى الطريحه المتينه فان دول هما اللى بيحافظوا على لغتنا و لولاهم لاندثرت اللغه العربيه.......

و ان مش كل الناس زيي و بيفكروا بنفس الطريقه........

و ان احنا لازم نساعدهم بإننا نتمسك بيها و مانسمحش للاحتلال الثقافى اللى غزا بلدنا و خلانا مش فاكرين لغتنا انه يتحكم فينا وفى لغتنا.....

رغم انه هو دكتور فى تجاره بس حاسس بأهميه لغتنا و حاسس بحساسيه موقفنا تجاه لغتنا.......

يا ريت كلنا نبقى زييه.....

واكبر مثال على كلامه,الجزائر و تونس........

ادينا شوفنا الشعب الجزائرى بيتكلم فرنساوى متعرب.........

يعنى بتبقى الكلمه عربى بس بينطقها بلكنه الفرنساوى.......

و غالبا اصلا مابيبقوش بيعرفوا يتكلموا عربى.......

فاحنا مش عايزين نوصل لمرحلتهم........

مرحله ان ولادنا يبقوا طالعين مش عارفين الكلمه دى عربى و لا انجليزى ولا فرنساوى,اهى كلمه بنقولها و خلاص......

انا بس معلش كان فى حكايه مره اخويا حكاهالى بس انا نسيت اكتبها فحبيت انى ازودها....

كان مره عنده فى محاضره من المحاضرات الدكتور سأل الطلبه انتو ترضوا انكو تلبسوا تى شرتات مكتوب عليها بالعربى؟؟؟

يعنى ترضى انك تلبس تىشيرت مكتوب عليها الحريه او الحرب او الرغبه او مكتوب عليها شتيمه؟؟؟؟

طبعا كل الناس قالت لأ طبعا ياااى العربى بيبقى شكله وحش.....

و كمان الانجليزى اروش,وشكله اشيك....

فبما ان الشباب اللى هما هيبقوا اباء و امهات المستقبل مكسوفين انهم يلبسوا هدوم مكتوب عليها بالعربى,فتخيلوا بقى ولادهم هيبقوا عاملين ازاى؟؟؟


انا بس مش عايزه اطول عليكوا,بس يارب يكون اللى انا عايزه اقوله وصل لكم و يا ريت فعلا كلنا نحاول اننا ننقى كلامنا و نفضل نتكلم بلغتنا..........

و جزاكم :)

ارجوكم اسمعونى و ركزوااااا

السلام عليكم ورحمه الله و بركاته

انا بس عايزه اقول لكل اللى هيقرأ الموضوع ده

مش لازم تعلقوا او تردوا

انا بس عايزاكو تقروه و تستوعبوه و تراجعوا نفسكوا...

يا جماعه عيب

بجد بجد عيب

يعنى مايصحش

و اللى على راسه بطحه يحسس عليها

و جزاكم :)

!!!!!!القلم خلص

السلام عليكم ورحمه الله وبركاته

انا انهارده و انا بذاكر

و اندمجت فى المذاكره جدا

و خلاص مابقيتش شايفه حاجه غير الكتب و الورق اللى قدامى

فقت على ان حبر القلم اللى بذاكر به خلص

القلم خلص؟؟؟

من غير ما اخد بالى؟؟

من غير ما اعمل حسابى؟؟

من غير ما اجهز للنهايه؟؟؟

خلاص القلم خلص..

و المشكله ان مش القلم هو اللى خلص

لأ ده حبر القلم اللى خلص

عارفين اول ما الموقف ده حصل قدامى

تخيلت حياتى

يا ترى انا جهزت لاخرتى؟؟؟

و المذاكره كانت بتمثل الدنيا,اللى بتسحب الانسان جواها و يستغرق فيها من غير ما يحس....

يا ترى انا هبقى عارفه ؟؟ انا حياتى هتخلص امتى؟؟ولا هتنتهى زى حياه القلم بالظبط؟؟

و القلم حبره بس هو اللى خلص

زيينا بالظبط,روحنا بس هى اللى بتروح لخالقها,مش جسمنا

يا ترى هنفوق امتى؟؟؟

لما يبقى الحبر فين؟؟؟فى اول القلم ولا فى نصه ولا فى اخره,ولا مش هنلحق نفوق؟؟؟

لقد تجمد فكرى

السلام عليكم ورحمه الله وبركاته

كل اللى هيقرا اسم الموضوع ده هيتخيل ان فكرى ده بنى ادم....

فكرى ده لا بنى ادم ولا تجمد........

هو كل الحكايه انى اول ما عملت المدونه دى كان عندى كام فكره كده عايزه اكتب عنها....

و بعد ما عملتها بقى عنى كميه افكار رهيبه موجوده فى فكرى......

و بقيت مش عارفه امشى فى اى حته واشوف فيها اى حاجه او اسمع حاجه الا ويخطر فى بالى موضوع ليها.......

و اخذت الافكار تتوالى على بكثره,و لم اكن استطع ان اسيطر عليها........

فخرجت عن نطاق السيطره,واصبحت اشعر بصداع دائم,من كثره الافكار و عدم كتابتى ليها " لانى مش فاضيه "

بس المشكله بقى ظهرت.....


انه من كتر الافكار و انا مابكتبهاش كل الافكار دى ذهبت مع الريح.....

ولا ادرى استعود ثانيه ام لا.....

كان عندى كم مهول من الافكار مش عارفه راحت فين.........

يا ترى انا نسيتها ؟؟؟؟

و لا عقلى رتبها؟؟؟؟

ولا اتجمدت فى مكانها و مش عارفه اخرجها؟؟؟؟و لا ايه بالظبط؟؟؟؟؟

و برده وانا بكتب الموضوع ده كان عندى كلام كتييييييييييييييييييييير نفسى اقوله بس مش عارفه انا نسيته و لا ذهب الى نفس المكان الذى ذهبت اليه أفكارى.؟؟؟؟؟؟

فالله المستعان على الكتابه.....

فنصيحه منى اى حد يجيلوا فكره عايز يكتب عنها,يبقى يكتبها فى نوته بحيث انه لما يفضى و يخلص امتحاناته يبقى يكتب عنها.........

و جزاكم الله خيرا على الاستماع....

تاج محل

السلام عليكم ورحمه الله وبركاته

انا جالى التاج ده من طيف "منه الله" ...

و بعد ما كتبته,حسيت انه ماينفعش يتنشر...

يعنى ماينفعش اللى رايح واللى جاى يقراه...

لانى حاسه ان هدف المدونه مش انى اتكلم عن نفسى,يعنى كشخصى ولكن الهدف انى اتكلم عن رأيي فى الحياه,وعن المواقف اللى بتحصل حواليا,يمكن حد يقراها و يستفيد منها...

بس و جزاكى الله خيرا يا منه الله صابر علام " مانسيتش اسم بباكى "على التاج...

واسماء عصام لسه كانت بتكلمنى و قعدت تقولى انى رخمه ورزله وحاجات كتير كده,بس انا برده مش مقتنعه انى اكتب عن نفسى.....

معلش انا عارفه انى كده ممكن اكون رخمه بس يلا بقى....


و جزاكم :)

اااهات الفراق

السلام عليكم ورحمه الله وبركاته

لقد فارقت اليوم اعز الناس لدى

فارقتهم ولن اراهم ثانيه

فارقتهم و كانت الدموع تملأ اعيوننا

و لم تستطع عيناى ان تمسكا بدموعى

فانطلقت تهرول على وجنتى

و لكنى حاولت ان امسكهم

و لكن مشاعر الفراق تغلبت على

و كلما حاولت ان انسى اننى لن اراهم ثانيه

يمر امامى شريط ذكرياتى معهم

شريط ذكريات رغم قصره

و لكنه كان ملئ بالاحداث

احداث مبهجه و احداث محزنه

احداث و احداث واحداث

مرت علينا دون ان نلحظها

و ان كنا لاحظناها لكنا امسكنا بها

و لم نتركها تهرب بنا الى اخر يوم من ايام لقائاتنا

و نفيق على الوداع

رغم اننا سنلتقى

و لكن لاندرى

اسنلتقى قبل الجنه ام لا؟

اااااااااه من الفارق

ااه و الف اااه

كلما اتذكر انى ان لن اراهم فى الجامعه

يؤلمنى قلبى

و اشعر باضطرابات فى نبضى

و اشعر اننى داخل اعصار لن انجو منه ابدا

كلما اتذكر انى لن اراهم مشغولون فى اعمالهم

يجهزون للحملات,ويهرولون فى الجامعه ذهابا وايابا

لكى يلحقوا باساتذتهم كيلا يغلقوا ابواب المدرجات

كلما اتذكر اننى لن اجد من يستقبلنى فى بدايه العام الجديد

و يرحب بى و يمنحنى الحب و الحنان

و يجعلنى اشعر واتذوق حلاوه الحب فى الله

و لن اجد من يخاف على و يعاوننى على الطاعه

و يوجه خطواتى

و يمسك بيدى على درج الحياه

و يسقينى خبرته على مر السنين

اشعر بان حياتى انتهت

و اتمنى ان اذهب الى الجنه سريعا حتى القاهم بجانب النبى

نلتقى فى موعدنا الذى اتفقنا عليه

موعدنا عند الحوض

لكى نشرب شربه هنيئه لا نظمأ بعدها ابدا

و تكون ايدينا مشبكه فى بعضها البعض

و نذهب الى قصورنا فى الجنه

و نقوم بعمل حلقاتنا دون ملاحقات امنيه

و نجلس و يجلس نبينا معنا

يبدأ هو حلقتنا بالقرأن

و نستمع الى صوته العذب

و نحن جالسين معا

لم و لن ننسى ذكرياتنا معا

بل اصبح لدينا ذكريات جديده

و لكن مع نبينا الحبيب محمد.

استودعكم الله سنه رابعه,و موعدنا الجنه ان شاء الله.

و ارجو من الله ان يوفقكم فى كل اعمالكم,و يهديكم الى صالح الاعمال.

و جزاكم الله خيرا على كل ماقدمتوه لنا.

دوره تدريبيه لشباب الاحزاب السياسيه

السلام عليكم ورحمه الله وبركاته..........

انا بكتبلكوا عن الدوره دى لانها عجبتنى و قلت يمكن تستفيدوا منها.........

و هو ده اللينك بتاع الموضوع:

http://www.cihrs.org/Default.aspx

هو بس انا اسفه جدا لانى ماعملتش اللينك يتفتح على طول.......

لانى لسه جديده فى العالم ده.......

فأعذرونى.....

وجزاكم :)

الهم الازلى

السلام عليكم ورحمه الله وبركاته

اكيد انتو تخيلتوا انا هتكلم على ايه.

هو الحقيقه مافيش هم ازلى غيرها

المذاكره حبيبه قلبنا

دلوقتى احنا فى شهر اربعه,يعنى شهر الهم كله

شهر المذاكره و شهر حضور المحاضرات.

انا بس عايزه اقولكوا حاجه مهمه عن المذاكره

المذاكره دى مش وحشه قوى كده زى ما احنا فاكرين

المذاكره دى مهمه جدا

احنا كطلبه شغلتنا المذاكره

بمذاكرتنا هنرفع شأن امتنا

بمذاكرتنا هيبقى لينا كلمه مسموعه فى المجتمع

ليه ما نجيبش امتياز

لو مش احنا اللى جبنا امتياز مين هيجيبه

ده احنا شباب الاسلام

احنا شباب الجيل ده

احنا قضاة المستقبل

احنا رجال اعمال المستقبل

احنا دكاتره المستقبل

و احنا نواب الشعب فى المستقبل

ايه اللى يخلينا نسيب المناصب دى لاى حد

ايه اللى يخلينى اسيب منصب دكتور فى الجامعه لواحد علمانى

اديله الفرصه انه يزرع بذور الفساد فى اولادى

ليه نسيب التجاره و مجال الاعمال لتجار المخدرات

ليه مانبقاش دكاتره شرفاء

نفتح صفحه جديده لمصر فيها نقاء الاطباء

احنا اللى هنكون الامه

يا جماعه احنا دلوقتى مش امه

احنا يا دوب فتات امه

ليه مانخليهاش امه بمذاكرتنا

ليه مانرفعش رايه اسلامنا بعزه وبرده بمذاكرتنا

ليه مانخليش العالم كله يحلف بحياة شباب مصر

ليه و ليه وليه,تسألات كتيره دارت فى عقلى

انا حسيت ان احنا عندنا سلاح فتاك و بسيط جدا

نقدر نقاوم بيه اى عدو

و اى مغتصب لارضنا

سواء مننا او مش مننا

ده احنا جيل المستقبل

يا ترى لو قابلنا سيدنا محمد,

هنقوله احنا عملنا اللى علينا,و لا مش هنرد لاننا مش عارفين نرد؟؟؟

احنا خلاص يا جماعه جه علينا الدور نمسك الرايه

فياترى هنرفعها ولا هنبقى وصمه عار فى تاريخ اسلامنا؟؟

معلش انا عارفه انى طولت عليكو,بس اتمنى ان يكون المفهوم اللى عايزه اوصله وصل.

و بتمنى لكم كل التوفيق فى مذاكرتكم و امتحاناتكم.

و جزاكم

أهلا و سهلا بكم

السلام عليكم ورحمه الله وبركاته


اول حاجه,اهلا بكم فى مدونتى.

تانى حاجه,انا كنت معترضه تماما على موضوع المدونات ده.

لانى كنت حاسه انه بقى موضه و طوب الارض بقى عامل مدونه.

لحد ما قريت فى مدونه بس للاسف مش فاكره اسمها,و احد كان كاتب عن الاستاذ/عبد المنعم محمود

كان بيقول ان احنا لازم نثبت لهم انهم مش هيقيدونا و مش هيقيدوا حريتنا فى الكتابه على مدوناتنا,وان احنا هنساند عبد المنعم.

طبعا اللى كان كاتب ماكانش كاتب بالمنظر اللى انا كاتبه بيه ده,بس الكلام وقع فى قلبى كالسهم .

و حسيت ان دورى مش انى اقف اتفرج على المدونات و انقضها وخلاص,لأ ده انا لازم اشارك فيها و يبقى ليا رأى.

و بس,كان هو ده سبب قيامى بإنشاء المدونه.

و فى الموضوع اللى جاى ان شاء الله هبقى اقول ليه سميتها " مللت الصمت "

و جزاكم