جزمتك....شخصيتك

السلام عليكم ورحمة الله و بركاته

على فكرة

الجزمة اللى فوق دى حقيقية.........و أنا شفتها بأم عيني......بس الحقيقة كان ناقصها العنكبوت......و حبة المخلوقات اللى فيها.......و العبيطة اللى هتلبسها.....

انا شفت المصيبة دى فى محل كلب الدو اللى فى شارع شهاب.....


و من ساعتها و انا مقتنعة ان الجزمة اللى فى الرجلان بتتدل على انه فى جزمة فى الدماغ.......

و الله فعلا......

انا حاسة كده.و مقتنعة بكده.....

حد عنده رأي تاني؟؟؟؟؟

........فرحة مش عادية

السلام عليكم و رحمة الله وبركاته

انا مش عارفة انا فرحانة قوي كده ليه....الحمد لله انى مبسوطة مش زعلانة

و الله ممكن اكون متضايقة و بقنع نفسي انى مبسوطة...زو غالبا هو ده اللى حاصل


بس الحمد لله العيد ده كان عيد حلو

بداية من يوم الوقفة و احنا بنعلق الزينة و صولا الى امبارح اللى هو اخر يوم فى العيد........

كنت الحمد لله مبسوطة... وفضلت مسوطة لحد امبارح....

بس امبارح كنت مبسوطة جدا....الحمد لله

اول يوم من زمان نبقي متجمعين كلنا.... حاجة حلوة رغم ان فى ناس ناقصين و ناس بنحبهم قوي...بس معلش هيجي اليوم اللى هنبقي كلنا فيه مع بض.يا رب اليوم ده يجي بقي.....

يوم 26-11 تميت عشرين سنة

مش عارفة اعمل ايه

انا حاسة انى بقيت عجوزة

انا دايما كنت ببص للناس اللى عندها عشرين سنة دول على انهم ناس كبيرة قوي

يعني الناس الكبيرة اللى فى الجامعة دول كبار قوي......

غريبة انى بقيت منهم.و كمان بقيت منهم بسرعة قوي


ماكنتش متخيلة انى ممكن ابقي منهم.......

ب ربنا يسهل و اقي احسن منهم......

صديقتي الصدوقة تمت قبل بيوم 19 سنة.

احنا الاتنين اتولدنا فى نفس المستشفي و على ايد نفس الدكتورة ( الله يرحمها) توفيت تقريبا من سنة او سنتين

اتعرفنا من سنتين...

كانت بداية معرفتنا اننا ماكناش طايقين بعض .......و مرة واحدة بقينا اصحاب.......و الناس كلها بيفتكرونا اخوات مش عارفة ليه الحقيقة بس حاجة كويسة

و اللى بيبقي قاعد معانا مابيفهمش ولا كلمةمن اللى بنقولها....زو احيانا كتيرة الناس بعد ما يسمعوا كلامنا يفتكروا اننا خلاص خمس دقايق و هنقتل بعض و يكتشوفا اننا ماكناش بنتخانق......... احنا بس كنا بنوضح وجهة نظرنا......

هى اتخطبت بقالها تقريبا شهرين..بس انا مش قادرة اتخيل انها السنة الجاية ان شاء الله هتبقي متزوجة.......يعني مش طالبة متفرغة........

و المشكلة انها هتسكن بعد كوالالمبور بحبة....يعني هيبقي صعب جدا اننا نتقابل كتير......

مش قادرة احط تصور للموقف..........



نيجي بقه للمذاكرة.........

انا لسه بادئة مذاكرة و عندي حبة مواد زي العسل..........حاسة قد ايه انى مش فاهمة فيهم حاجة.....

بس اديني بحاول......

و ان شاء الله هفهمهم و هجيب فيهم تقدير عالى ان ماكنتش الدرجة النهائية........

بس رغم ده كله انا سعيدة الحمد لله......

و كل عام و انتم بخير

!!!!أصل؟؟؟.....طيب؟؟؟......أساسا؟؟؟؟........مش عارفة

السلام عليكم و رحمة الله وبركاته

ايه رأيك تعملى المشروع الفلانى؟؟؟

مش عارفة و الله هو فكرة حلوة جدا بس شكلى هيبقي عامل ازاى قدام الناس!!!!!!

ايه رأيك فى الهدوم بتاعتك الجديدة؟؟؟

هى اصلا غالية جدا و شيك مووت بس بصراحة لما سألت معرفش مين قالتلى دى شكلها تقليدى قوى, فبصراحة انا هتكسف البسها, الناس تقول عليا ايه؟ جاهلة فى الموضة و الفاشون؟؟

ايه رأيك تشتغل و انت فى الجامعة, انت شاب و عندك طاقة كبيرة و حماسة عالية؟؟

طبعا نفسى اشتغل , بس لو حد عرف انى بشتغل هيقولوا ايه؟؟ هيقولوا انى محتاج فلوس..ايه المنظر ده يعنى!!


ايه رأيك تعمل حاجة جديدة فى كليتك, اظن انك واحد مخه نظيف, ايه الى مقعدك؟؟

مش عارف و الله, بس اصل انا خايف الناس تقول عليا انى بتمنظر و حابب اعمل شو, و انت عارف احنا مابنسلكش مع كلام الناس!!!



طيب دلوقتى انا مالى و مال الناس

ليه احنا دايما بنحط الناس فى اولويتنا...



ليه دايما لما بنفكر في اى حاجة لازم يبقى الناس دول محشورين معانا فيها.....

هو مش انا حرة نفسي....و مش انا اللى هتحاسب يوم القيامة...و محدش هيجى يتحاسب بدالي.....

طيب انا ليه دايما بفكر فى الناس اول حاجة....

و ليه اساسا الناس بتحشر نفسها فى اللى مالهاش فيه...

البسي ده و اعملى ده و اتجوزى ده و روحى المكان الفلانى...اصل لو حد شافك فىالمكان العلانى هيقولوا عليكى ايه.......ايه ده انتى بتلبسى غامق كده ليه...ايه ده انتى بتلبسى فاتح كده ليه.....

ده حتى و انتى فى الشارع يا شيخة....... ده مافيش اتنين بيتخانقوا فى الشارع الا و لازم يكون فى حكم فى النص و بيقول لده انه غلطان و ازاى يعمل كده...

ايه يا جماعة ماتصلوا عالنيى ........

ايه اللى دخل الناس فى حياتنا....

ليه دايما منتظرين رأى الناس...

مانقدرش نخطو ربع خطوة فى حياتنا الا لما ناخد رأى ده و زوق ده و فتى ده و هجس ده....

بجد حاجة تخنق........

و يا سلام لو كنت ماشى بدماغك ( بدماغك يعنى مابتخدش راى حد الا وقت الحاجة)

يبقى انت بقى خلاص خرجت عن الملة...و ازاى ما تشركش الناس فى حياتك.......انت بتتكبر عليهم؟؟؟!!!

اااااااااااه.....اصل احنا مش من مستواك......

بجد حاجة تغيظ

نور

السلام عليكم و رحمة الله وبركاته

لما تلاقى البيت نور مرة واحدة

و تبقى فرحان قوى

و نفسك تروح البيت بسرعة

مش عارفة ليه

بس فى حاجة حلوة قوى فى البيت

عايز تلحق تقعد معاها اكتر وقت ممكن

هى دى

لما اخوك لا و مش اى اخ اخويا اللى فوق اللى فوقى علطول يبقى عنده بنت حلوة قوى و اسمها نور

اخويا ربنا رزقة ببنوته اسمها نور

انا مش عارفة انا متعلقة بيها قوى كده ليه

مش الطبيعى انى ابقى متعلقة قوى كده بطفل لسه مولود

او يمكن انا اللى نسيت

اصل اخر مرة كان عندنا بيبى كان من تلات سنين


يمكن اكون متعلقة بيها قوى كده علشان انا كنت مستنياها من زمان

مش عارفة

او يمكن علشان انا كنت متابعاها من اول ما مامتها بقت حامل فيها

و قاعدة بكلمها كل يوم و هى جوا بطن مامتها

مش عارفة بس بحبها قوى و عايزة اقعد اتفرج عليها طول اليوم

نورتى البيت يا نور

و عقبال يا رب لما تكبرى و تقعدى تقرفينى و انا بذاكر و تزنى فى ودانى

على الله يا نور لما تكبرى تحترمينى و تقوليلى يا عمتو

و مبروك عليكى رقم 9

انا بحبك قوى يا نور

مولد سيدى جبريل

السلام عليكم و رحمة الله و بركاته

عارفين سيدى ابو طرطور

اه و الله

سيدى ابو حتى مش ابى لأ ابو طرطور

ده كان مقام فى الكيت كات لواحد اسمه سيدى ابو طرطور

سيدى ابو طرطور ده بقى ايه

انا معرفش قصته

بس اللى انا اعرفه ان الناس كانت بتجيله من كل حدب و صوب علشان يعملوا المولد بتاعه

و يجوا يتمسحوا فيه و يطلبوا منه الرجا

بلا وكسه علينا


لقيت بقى نفس القصة بتتحقق مع سيدى جبريل

سيدى جبريل ده ايه

شيخ

بيصلى بالناس فى الحرم

قرر انه هيجى مصر فى رمضان علشان يصلى بالناس

تلاقيه مثلا بيصلى فى مسجد النور اللى فى العباسية

و تلاقى ناس من كوالالمبور جايين يصلوا وراه

طيب خير بقى

ايه بقى

انا اللى خلانى افتكره انه اليومين دول بيصلى بالناس فى مسجد راغب اللى فى اكتوبر

فطبعا نتيجتا الى ان مسجد الحصرى ركن على جمب السنه دى

من ساعة ماحبايبنا حطوا ايديهم عليه

فبالتالى الناس اتجهت الى مسجد جامعة مصر او مسجد راغب او فى مسجد جديد اسمه الطحاوى

و بناءا على ان مسجد راغب ده فى حتة مقطوعة

فبالتالى مافيش امم امم بتروح تصلى فيه

اذ فجأتن
لقينا مسجد راغب مجهز مساحات هلامية علشان تكفى امم الناس اللى جايه


انا اللى انا مش فاهماه

هى الناس بتصلى علشان هى بتحب ربنا و لا بتصلى علشان هى بتحب الشيخ ده

انا مش قادرة استوعب

انا ايه اللى يخلينى انزل من بيتى فى اكتوبر فى نص الليل و اروح مسجد عمرو بن العاص علشان اصلى التهجد ورا الشيخ جبريل


فرقى بقى ايه عن الناس اللى كانت بتروح لسيدى ابوطرطور


خلاص يا سيدى

شيل طرطور و حط جبريل

ولا تزعل نفسك


مش معقولة تكون وصل بينا الحال للدرجة دى

ايه انهبلنا ولا انهبلنا

يلا رمضان كريم

و كل سنة و انتوا طيبين

و يعيده عليكوا بعافية

و العواف

هو انا مين؟؟؟؟؟

السلام عليكم و رحمة الله و بركاته

مش عارفة اكتب ايه ولا ايه ولا ايه

اكتب عالصدمة الحضارية اللى اتصدمتها

ولا اكتب عن رمضاان اللى قرب يخلص

ولا اكتب عن الدراسة اللى كمان كام يوم

ولا عن الدويقة

ولا عن مجلس الشورى ولا ولا ولا.............

انا مش عارفة اكتب

خلاص مخى توقف عن التفكير


مش عارفة ايه نظام الدنيا دى

ماشية ازاى

رايحة فين و هتودينا فين

هنروح معاها ولا هنقفلها



هنبقى مبسوطين فيها و فى الاخرة

ولا مبسوطين فيها بس

ولا ايه نظامنا

حياتنا ماشية ازاى

عملى ده كله

رايح فين

الناحية اليمين ولا الناحية الشمال


انا مين

انا بعمل ايه

انا خلاص هيبقى عندى عشرين سنة

راحت فين كل السنين دى

عملت فيها ايه


اتقبل ولا لأ

و لا بقى حمل عليا

المفروض انى ابقى مبسوطة ولا زعلانة

انا مش فاهمة حاجة

هو انا مين؟؟؟؟؟

عام على حبى له

و قد مر العام

عام على حبى له

عندما رأيته يمر من أمامى

أرسلت عينى لقبلى

لكى تخبره انه قد أََ َسر


رأيته و ياليتنى لم أره

فقد غدى قلبى يسهر على مر الليالى

و عينى تدمع فى سهر الليالى

اشتاق له من دون أن أراه

و عند رؤيته اشتاق اليه اكثر فأكثر

و اصبحت غير قادرة على التحكم فى اشتياقى اليه

حيث انه يزداد يوما وراء يوم

و كلما رأيته

لا استطيع النظر اليه

حيث ان قلبى لا يتحمل تلك المواقف

و لكنى لا استطيع

يجب ان انظر اليه

لانى لم أره منذ زمن

كى اظل اتذكر شكله

و كيف لى أن أنسى شكله

لقد حفر فى مخيلتى

لا يفارقها مهما حصل

لالالالالالالالالالالالالا

استنوا كده ثانية

كفاية لحد كده

طيب


نرجع بقى لموضوعنا


دلوقتى انا بقابل ناس كتيرة جدا...........تمام؟؟؟؟

فى منهم ناس عاطفيين......و فى ناس رومانسيين ( و فى فرق شاسع مابين الاتنين) و فى ناس عقلانيين......

طيب!!!

انا دلوقتى مافي حدا بيشوفنى الا و يقولى انتى على فكرة شخصية عقلانية جدا........

طيب..تشكر يا زوق.......

و فى ناس بتشوفنى تقولى على فكرة انتى جافة جدا........

و ماله برده........تشكر يا زوق...

و فى ناس بتشوفنى تقولى على فكرة انتى عاطفية جدا بس انتى مابتحبيش تبينى لحد حاجة...

و ماله ........تنفع وقت الزنقة.....

طيب.......

انا بس خلاصة للموضوع ده انا عايزة اتكلم فى حاجة.........

الحاجة دى اللى هى ايه؟؟؟؟؟؟؟

دلوقتى فى بنات كتيرة اعرفهم مهم عندهم جدا انى اول ما اشوفها لازم اسلم عليها و احضنها........و اقولها انتى وحشتينى قوى.....


طيب الموضوع ده ماينفعش معايا...........انا اساسا مابحبش اسلم عالناس كتير اخرى قوى معاهم انى اسلم عليهم بإيدى.......و يعنى لو واحدة ماشوفتهاش بقالى قرنين ممكن اسلم عليها بحرارة شوية.....

غير كده لأ؟؟؟؟؟؟

طيب انا اعمل ايه فى حياتى

و فى بنات تانيين اعتقدوا انى جافة جدا و بقوا يتعاملوا معايا بطريقة متخلفة زيهم........

يعنى نظام ايه.يرزعوا بالكلام و لا يهمهم......و ععااااااااااااااادى يعنى يا بنتى.......

طيب و ماله برده......


فأنا كاتبه الموضوع ده ليه.......
اول نقطة:

نفسى فعلا يبقى فى وسطية فى التعامل مع الناس......

يعنى وقت ما الموقف يبقى عايز حد جامد يبقى فى......و وقت مايكون عايز حد طيب يبقى فى.......

انما ماينعش الانسان يبقى كده و لا يبقى كده.....لازم يبقى كده و كده......

يعنى لو فى موقف انا المفروض اخد فيه موقف حاسم...لازم اخد الموقف.......انما ماقعدش اعيط و اندب عالأطلال......

و برده لما يبقى فى حد مثلا بيعيط و متضايق...اكيد مش هقعد الطش لها ...او حتى اهزر معاها........اكيد هبقى طيبة معاها و اقولها معلش......و اكيد برده مش هقعد اعيط جمبها...

انما مافضلش طول عمرى اول ما اشووف حد اقوله .إنى احبك فى الله.........و افضل طول عمرى احب الناس فى الله........


تانى نقطة:::

موضوع المشاعر و اظهارها.......

المشاعر دى حاجة حلوة جدا.........

و جميل فعلا ان الانسان يبين مشاعره لأى حد ....سواء بالحب أو بالكره......

بحس انها عنوان للتعامل مع الأشخاص.....

يعنى انا فى عقلى دايما بصنف الناس.........

أى حد أقابله لازم اصنفه...........ناس فى الناحية اليمين......و ناس فى الناحية الشمال......

و التصنيف ده بيبقى من اول مقابلة......و بعد كده بيبقى فى حكم تانى بعد التعامل.....و بعمل إعادة للتصنيف.........


طيب نرجع تانى لموضوعنا........

فى ناس بتستخدم المشاعر صح.........و فى ناس بتستخدمها غلط..........

طيب مين اللى بيستخدمها صح و مين اللى بيستخدمها؟؟؟؟؟

ان شاء الله هبقى اكمل فى موضو تانى لانى زهقت من الكتابة........

و على فكرة ماتاخدوش فى بالكوا من الكلام الفظيع اللى انا كاتباه فى الاول ده.......

انا بس كنت عايزة اكتب مقدمة للموضوع و ماكنتش لاقية مقدمة.......فكتبت الكلام ده

:D

انا مش عارفة هى السنة بتجرى بسرعة و لا انا بتهيألى

السلام عليكم

هو مش انا كنت لسه مخلصه امتحانات نص السنه

هى جت تانى بسرعة كده ليه

انا زهقت من المذاكرة

مش عايزة اذاكر

رغم انى اصلا لسه ما بدأتش

امهند

رجعت تانى وقت الامتحانات

و رجعت الكأبه

و بدأت الممنوعات

هى اينعم بتبقى ممنوعات

بس على مين

الانسان برده ربنا خلقله عقل

يعرف يتصرف بيه فى وقت الزنقة

و خلق له برده لسان يقدر يمسح بيه مخ الناس اللى قدامه و يقنعهم باللى هو عايزة


بس رده
مهما حصل لازم نذاكر

اوحش حاجة

انه يبقى فى ناس قاعدين متربصينلك و شايفين انت بتذاكر ايه و بتعمل ايه

و كل شوية يسألوك ها وصلت لحد فين؟؟؟؟

انت بتهرج انت مابتذاكرش عدل؟؟؟؟

و هما اصلا قاعدين حطين رجل على رجل و بيجيبوا مقبول و فالحين بس يتكلموا














انا نفسى اعيط

بس طبعا على مين

انا عمرى ما هعيط قدام اى بنى ادم

مكن استنى لحد ما ماما تسافر و اقعد لوحدى فى البيت و اقعد اعيط

بس برده كرامتى هتنقح عليا



يبقى خلاص الحل ده ماينفعش














طيب



هو انا ممكن اكلم مؤة فى التليفون و نقعد نندب حظنا مع بعض


ولا اقولكوا مؤة دى كئيبة و هتجبلى اكتئاب













شكلها كده هتصفصف على انى اذاكر فى الاخر


بس المواد رخمه قوى

و الدكاترة كتييييييييييييييييير

كل مادة عندى ليها دكتورين

مش عارفة انا عهعمل ايه باتنين

ما كفاية علينا واحد

يعنى بدل ما انا بدرس 5 مواد

بدرس عشرة

حاجة تنقط



طيب

خلاص
انا قايمة اذاكر....



ماحدش بس يركز قوى فى كلامى

............ :)حبه كده

السلام عليكم

بما انى فى ناس كتيرة اتهمونى بأنى ناقمة على الحياة.........و أولهم اخويا العزيز.........

فأنا قررت انى هكتب حاجة ظريفة..........مش عارفة هكتب ايه بس مش مشكلة.........

انا مرة كنت كاتبة موضوع عن التوكتوك و المخصوص فى المنتدى هنقلهلكوا هنا..........

لحظة واحدة

طيب

ده اللينك بتاع الموضوع

التو توك و المخصوص.........مخلوقات فضائية على أرض الواقع


بصوا هو انا مش مقتنعة انه ظريف

بس الناس كانوا بيقولوا انه ظريف........

فيلا على بركة الله.....

عموما عموما....هيجيلى يوم و ابقى فرحانة من حاجة فى البلد العجيبة دى و ابقى اجى اكتبها........

صاحبة المدونة

يا حلااااوى يا ولاااااااااااااااااااااد

يا حلاوة يا ولاااااااااااااااااااااد

ده سعادة البيه الداكتور الأوبهه الباشا حبيب الملايين أحمد نظيف زارنا فى الكلية

ده احنا زارنا النبى

خطوة عزيزة ...........مأنس و مشرف


اجرى يا بت ولعى عشاى

و الله ابدا مانت ماشى الا اما تتغدى معانا

اجرى يا بت فزى قومى اخبزى و ابخى و ابحى

ده احنا زارنا النبى

يا الف اهلا يا الف سهلا

و الله كت قولتلنا يا داكتور انك جاى كنا فرشنا الارض ورد ( و الله الجامعة ما كدبت خبر)

فجأة لقينا ورد كتيييييييييييييييييييييييييييييييييييييييييييييييييييييير

و الدنيا نضفت و استحمت كده و الجامعة نورت

اتارى سى الاستاذ احمد نظيف نورنا

امهند

القصة بدأت ازاى

بدأت بإن الدكتور على الديب.........الاستاذ الدكتور بكلية التجارة قسم رياضة و تأمين بيدرسلى الترم ده رياضة (حسبى الله و نعم الوكيل) بس ما علينا

جه خير اللهم اجعله خير فى محاضرة يقولنا

بكرة الدكتور احمد نظيف هيجى زيارة للجامعة

و لازم كلكوا تروحوا تحضروا الندوة بتاعتوا

و لو روحتوا هديكوا سؤال هيجيلكوا فى الامتحان!!!!!!!!!!!!!
و لو ماجيتوش مش هيحصلكوا طيب!!!!!!!!!!!!!!!!!!!!!!!!!!!!!!!!!!!!!!!!!!!

سيبكوا من كل علامات التعجب دى...........لأنه كلام متوقع من شخصية بالمنظر ده......

المهم

جه اليوم المعهود

و انا اصلا كنت ناوية اروح لمجرد المعرفة من قبل ما الدكتور يقول........

فقلت اكيد مش هلاقى حد من دفعتى هناك

بس لما رحت صعقت

لقيت كككككككككككككككككككككككل 2 ب هناك

حاجة وكسة و الله.......

امهند

دخلنا................و صباح النفاااااااااااااااااااااااااااااااااااااااااااااااااااااااااااااااااااااااااااااااااااااااااق

الدنيا مكونة من نفاق فى نفاق فى نفاق فى نفاق.........إلخ

و الناس كلها متقمعة و متلمعة.........و كأنهم رايحين يزوروا النبى

و اللى لابس بادج معرفش عليه ايه و اللى لابسة ايشارب على شكل علم مصر (يا عينى عالوطنية) و اللى حاطة بروش دهب اربعة كيلو(ماتفهموش الغنى ده جه منين) و اللى حاطط بروش علم مصر...........

و حاجة اخر ألسطة

المهم

انا دخلت القبة و لسه بقول يا هادى...............لقيت بلال قاعد فى نفس المربع الى انا قاعدة فيه..........

للى مايعرفش بلال ده طالب فى جامعة القاهرة بس معرفش فى كلية ايه

هو اللى دايما فى اى وقفه او مسيرة او مؤتمر بيقول كلمة طلاب حزب الغد.........

المهم الولد ده ماشاء الله عليه كلمنجى طحن

يعنى بق و طلعله بنى ادم..............كلامه موزون جدا و مؤثر جدا و بيشعلل القعدة........

انا اول ماشوفته قلت الشخصية دى مش جاية كده سبهللة............
اكيد جاى يعمل حاجة.........

خلاص و سيدنا دخل القاعة............

طبعا بدءوا الكلام بمقدمة طوييييييييييييييييييييييييييييييييييييييييييييييييييييييييلة فيها القاب لسيدنا........

و سيدنا بدء الكلام

بسم اله الرحمن الرحيم
بلا بلا بلا بلا بلا بلا بلا بلا بلا بلا بلا بلا بلا بلا بلا
بلا بلا بلا بلا بلا بلا بلا بلا بلا بلا بلا بلا بلا بلا بلا بلا

بلا بلا بلا بلا بلا بلا بلا بلا بلا بلا بلا بلا بلا بلا
بلا بلا بلا بلا بلا بلا بلا بلا بلا بلا بلا بلا بلا
بلا بلا بلا بلا بلا بلا بلا بلا بلا بلا

و فجأة

لقينى واحد بيقول::

يا ريس
يا ريس

مصر حزينة يا ريس
مصر حزينة

و للأسف مش فاكرة الكلام

بس الطلبة سقفوله بحرقة جامدة جدا

كأنه قال الكلام اللى كان على لسانهم

و فعلا كلمته كسرت الرتم الممل بتاع المحاضرة


كلامه كان جميييييييييييييييييييييييييييييييييييل جدا

بس كان فيه مشكلة

انه قاطع كلام احمد نظيف

فطبعا احمد نظيف ( و انا اقصد انى ما اقولش دكتور) استغل الفرصة و قلبها لصفه

و قعد يقول علشان كده مصر فوضى

علشان كل ما اوحد يحب يقول حاجة يقولها فى الوقت اللى هو عايزه مافيش نظام

و اقعد يرغى يجى ربع ساعة

بس كان نفسى ان بلال يستنى لحد وقت المداخلات و لو رفع ايده و ما اتردش عليه يبقى يتكلم

بس احسن من مافيش.........

بس كان يوم فظيع

المهم
انا كان فعلا نفسى اقول لاحمد نظيف كلمة واحدة بس

يعنى هى مش كلمة و لكن جملة واقفة فى زورى

انا بدعى عليك كل يوم الصبح لانى بقف عالمحور نص ساعة بسبب ان سيادتك معدى

ربنا يخليك لينا

تحديث
ده اللينك بتاعه فى اليوتيوب

http://www.youtube.com/watch?v=yPVzMzEEAm4

صاحبة المدونة

........دعونا نتنفس

دعو الإبداع يتنفس.......

ازاى بنى آدم يفضل طول عمره فى روتين.....

يصحى الصبح عارف هو هيعمل ايه....

كاتب كل حاجة,يا ريت فى ورقة,لأ ده كاتب كل حاجة فى مخه و فى اطرافه كلها........

حافظ مش فاهم...........متخلف مش متقدم.............اهبل و عبيط.......

فاكر بكده انه بيحافظ عالنظام.......

فاكر انه كده بينصر امته..........
فاكر انه بالطريقة دى هيصلح البلد.........

بس للأسف.........احنا شعبنا كله ياعينى حاطط نفسه جوه صندوق قد الفستوكة........

صندوق عبارة عن سنتى فى سنتى........

لو طلع بره السنتى يموت......

و عمره ما هيقدر يطلع بره السنتى....

لما يبقى فى ناس بتعمل غسيل مخ لناس فى ثوانى.........

و يعنى الناس دول فاكرين انهم الصح, و انهم بيوروا الناس التانية الطريق الصح....

و يا حرام هما الاتنين غلط.........

انا نفسى فى ابداع........


نفسى فى حرية........

عايزة امسك ورقة و قلم و اكتب افكار........

افكار لاى حاجة................أى حاجة فى الحياة........


بس افكار

صاحبة المدونة

زحمة و هبل كتير

انا عندى ازدواجية.............

ده اخر قرار قررته من حوالى شهر و نص.........

هو مش قرار هو اكتشاف......

طالما فى ناس انا مش طايقاهم و لسه مستمرة معاهم و بعاملهم كويس جدا...........يبقى ده معناه ايه؟؟

معناه ازدواجية..........و مافيش تفسير تانى....

ابتديت ابص على ناس اكتشوفوا نفس اكتشافى و اشوف هما كان ايه رد فعلهم........

فلقيتهم بينقسموا إلى فئتين:

1- اولهم ناس انحدروا تماما نتيجة لأعتقادهم انهم هم الصح و ان الباقى دول مابيفهموش اى حاجة و انهم على طول غلط...

2- التانين,كانوا قمة فى السلبية رغم انهم عارفين انهم غلط بس مستمرين.........علشان الدنيا ماتقعش.......لأنه فى نظام و لازم نمشى عليه


لقيت انى ماينفعش اخد تجربة حد.خااالص

لو انا مافكرتش لوحدى و خدت قرارى لوحدى, هفضل طول عمرى فى الازدواجية , و فى الدوامة اللى انا دخلت نفسى فيها.......

مادام انا مش عايزاهم و عندى بديل ليهم....ايه اللى مخلينى معاهم......

صاحبة المدونة

................كل سنة و انتوا طيبين, و يعيدوا عليكوا بعافية

السلام عليكم

كل سنة و انتوا طيبين
و عقبال كل سنة كده ان شاء الله
و عقبال عندكو
و زى انهارده ان شاء الله تكونوا واقفين على جبل عرفة

امهند

انهارده كان يوم الاضراب..................يوم 6 ابريل...............

انا كنت متحمسة قوى ليوم 6 ابريل

يوم الاضراب

و كويس انى شاركت فيه

بس فى مشكلة صغيرة
انا مش فاهمة هى الناس بتعمل احتجاجات فى الشوارع ليه.......هو مش المفروض ان الاضراب يعنى ماننزلش الشوارع و نوقف حال البلد لمدة يوم...........

هو عموما انا مستغربة
بس انا محبتش اشارك فى الفعاليات دى اضافة الى انها بتفقد اليوم معناه........انا مابحبش اشارك فى حاجة مش منظمة..........لأنها بتبقى هرجلة و مرجلة و ضرب و تخبيط.......

و انا كرامتى اعلى من انى اتبهدل و اتضرب عالفاضى.........مع انى ممكن اوصل نفس الرسالة بكرامتى و من غير ضرب.......

المهم فى حاجة لفتت نظرى فى الاضراب ده..........

هو ان جماعة الاخوان ما شاركتش فى الاضراب مشاركة رسمية, و نزلت تصريح بيقول انها مش هتشارك كجماعة........و لكن اللى عايز يشارك يشارك مشاركة فردية....

اللى خلانى بقى استغرب اكتر ان الناس للأسف الشديد مافهمتش التصريح ده صح...........و لكن خدت الكلام اللى عاجبها و على مزاجها و سابت الكلام التانى..........

و انا واثقة انه كل المدونات هتتراوح مابيت مؤيد و معارض....... و هتلاقوا فى ناس بتشتم.........زو ناس فرحانة...

و لكن انا هوضح موقف الجماعة زى ما انا مفهمته, و حطوا تحت كلمة "انا فهمته" دى مليون الف خط............لأنى و لله الحمد مش المتحدث الرسمى بأسم الجماعة........

ان الجماعة مادخلتش بأسمها لانها مش عايزة العمل يتلون..............
يعنى ايه يتلون؟؟؟؟

يعنى المفروض ان الحركة دى حركة شعبية..........يعنى حركة شعب خالصة لوجه الحكومة المصرية........

و مش اللى منظمنها هما الاخوان..........

لأن الاخوان طول عمرهم بعترضوا و يعملوا مظاهرات و اضرابات..........

انما لما الشعب هو اللى يعمل الاضراب,ده معناه حلو جدا.........و معناها ان الشعب بدأ يثور و يتحرك.....و بقى فى ناس بتفهم فى الشعب المصرى..........

و انا واثقة ان 90% من الجماعة مشاركين فى الاضراب.........و لكن بدون مسميات........

خلوا الشعب يتحرك مرة بقى......مش كل حاجة اخوان........

ولا انتوا ايه رأيكوا؟؟؟؟؟؟

صاحبة المدونة

.........أنا حزينة

انا عارفة انى زهقت اى حد شوفته امبارح لانى كل ما اشوف حد اقوله "انا حزينة" لأو "حزينة جدا"......

انا فعلا امبارح ده يوم رخم جدا و بكرهه جدا جدا جدا
و كل سنة بقول هعمل نفسى هبله و مش هتأثر باليوم ده بس برده بتأثر جدا.....

انا خلاص زهقت

انا مابحبش حد يشوفنى حزينة.........

كل الناس اللى اعرفهم خدوا عليا و انا سعيدة و مبتسمة.....

الأن لا أقدر على الابتسام..................................لأنى حزينة

إلى متى تظل الفتاة مقيدة؟؟؟

انتى ازاى بتعملى كده البنات المفروض مايعملوش كده.....

انتى ازاى شايلة شنطة على ضهرك ....دى حركات ولاد.....

انتى ازاى بتلبسى كوتشى........انتى لازم تلبسى جزمة بكعب تجبلك كساح امد الدهر......او تلبسى جزمة ضيقه جدا و تخليكى تعيطى طول النهار علشان تبقى بنوتة عسولة........


ازاى تفكرى انك تعرضى بحث فى المدرج او انك تعملى اى حاجة هتبقى ظاهرة فيها,دى حاجات للولاد بس.......ماينفعش البنات تعمل كده
......


انا اول مرة اشوف بنات بتفهم و تفكر...........


حد بقى يقولى بقى الكلام ده كلام طبيعى ولا مجرد هلاوس و وساوس فى ادمغة ناس متخلفين و رجعيين بجد و الفمروض انهم يرجعوا ايام ما كانت البنات بتدفن اول ماتولد........