Sunday, June 17, 2007

!!!!!!!يبقى انت اكيد فى مصر

لما تقوم من الفجرعشان تلحق تنزل و تروح قبل الزحمه

و لما تكون شايل هم انك هتروح تقضى حاجه فى مصلحه حكوميه

يبقى انت اكيد فى مصر

لما تكون نفسك تروح فى ميعادك و تتأخر بسبب المواصلات

يبقى انت اكيد فى مصر

لما تروح المصلحه الحكوميه

بعد شحطته المواصلات

و ركوبك لخمسين الف مواصله عشان توصل للمكان اللى انت عاوز توصله

و تلاقى الموظفين مبوزين فى وشك

يبقى انت اكيد فى مصر

و لما تفكر انك تستفسر من اى حد من الموظفين على اى معلومه

و تلاقيه قلب حواجبه حداشر

و بوزه طول مترين

و هاين عليه يقوم يلطشك بالألم

يبقى انت اكيد فى مصر

لما تعطل اى حد من الموظفين عن الورد اليومى المقدس

ألا و هو الفطار

و تتبجح و ترفع الالقاب و تطلب منه انه ياخد منك الورق و يخلص مصلحتك

يبقى انت اكيد فى مصر

لما تبقى تايه فى الشارع و تسأل الناس عن الطريق

و تلاقى خمسين واحد بيوصفولك الطريق

و كل وصف يوديك فى حته

و مافيش حد راضى يقولك انا معرفش

يبقى انت اكيد فى مصر

لما يبقى موجود عربيه شرطه قدام المدرسه

علشان تمنع معاكاسات البنات و تمنع الشغب

و يقعد العساكر اللى فيها يتسلوا على البنات فى الرايحه و الجايه

يبقى انت اكيد فى مصر

لما يكون فى واحد حاكم 100 مليون مواطن لمده اربعه و عشرين سنه

و متحكم فى افكارهم و تصرفاتهم و متسلط عليهم

و كمان ابنه هيمسك بعد ما ربنا يكرمه زى ما كرم السادات

يبقى انت اكيد اكيد فى مصر





at

10 comments:

  1. هند عبد الفتاحJune 17, 2007 at 4:06 PM

    سلام عليكم

    والله طلعتى كل اللى جوانا يا سمسمة
    وأكيد لما نكون بنعانى من كل ده
    هنكون فييين؟؟؟

    أكيد فى مصر

    واحشانى كتييير بقالى فترة مقعدتش معاكى وألف مبروك على مدونتك المميزة

    وعقبال النتيجة

    سلامى وقبلاتى

    ReplyDelete
  2. أبو الفـــداءJune 17, 2007 at 9:03 PM

    نصيحة...

    من الأفضل إرفاق صورة في كل تدوينة..
    ذلك يقضي على الملل البصري
    من القراءة...

    شكرا

    ReplyDelete
  3. فكرةJune 17, 2007 at 9:17 PM

    هههههههههههه
    الاغنيه دى مفيش حد ما اتريقش عليها
    " يبقى انت اكيد فى مصر "
    هما اللى جابوه لنفسهم
    عملولنا البحر طحينه واحنا معندناش عسل
    :D
    يشربوا بقى

    هم يبكى وهم يضحك والله

    ReplyDelete
  4. الـفجـريـــةJune 17, 2007 at 11:02 PM

    ازيك يا سمسمة

    على الرغم مما فى تلك الاغنية من استعباط

    الا انى معنديش مشكلة معاها خالص

    مشكلتى معاها انهم يقنعونى انها على مصر

    وسعت منهم جداااا

    واكتروقت بتغيظنى لما اكون راجعة من الكلية وسط الزحمة ولامواصلات

    بعد محاضرة من احد الدكاترة من لانوع بتاع المنهج واللايحة

    والامن بتاع الكلية يكون غلس فى حاجات

    وارجع الاقيها شغالة
    بكون عايزة اقولهم
    دنتو كدابين كدب

    يلا خير
    مبروك عليكى الاحازة
    وعقبالنااااااا

    ReplyDelete
  5. Mohamed AbdelgeleelJune 18, 2007 at 4:45 PM

    الشعب المصري هو تلك الشاب اللى اتخرج من 3 سنين ومازال قاعد فى البيت ولو حد عرض عليه انه يعمل اي حاجة تضر بلده يقولك لا كل الا مصر الشعب المصري هو ذلك الرجل الكبيير اللى واقف قدام طابور كبيير سواء فى الفرن او الجمعية او البوسطه او اي حاجة فى بلادنا وهو بيقول يامسهل الحال يارب ها نت الشعب المصري هو اللى تلاقيه بيحاول يريح السياح جدا وياسلام لو سأله على حاجة تلاقيه واقف وقفه ابن البلد بجد الشعب المصري اللى ممكن يكون مخنوق من مصر جدا ولما يدخل اي شات يلاقى حد بيشتم على مصر يقعد يدافع عنها بكل ما يملكة من قوة الشعب المصري هو الشعب الوحيد اللى ممكن يعيط من مسلسل درامي الشعب الوحيد اللى بيساعد اي حد فى اي وقت ممكن يكون محتاج جدا للفلوس لكن هو الشعب الوحيد اللى بيقف جنبك وقت متحتاج
    الشعب ده هو اللى بيقف قدام المضروب فى حادثة حتى ولو حادثة عجلة بتلاقى اللى بيجري بميه بسكر او بكرسي او بكوبية ليمون او حتى اللى بيطبطب عليك ويقولك بضحكة حلوة تعيش وتاخد غيرها

    ReplyDelete
  6. Rehab SaberJune 18, 2007 at 4:57 PM

    هههههههههههه

    والله معاناة

    ReplyDelete
  7. AnonymousJune 18, 2007 at 7:24 PM

    مالها مصر بقى
    أم الدنياواللى يسافر هيعرف كده
    وهيحبها اكتر

    ReplyDelete
  8. AnonymousJune 18, 2007 at 10:47 PM

    اللى هيلف الدنيا هيشتاق لأهله مش لحياه فى مصر
    :)

    ReplyDelete
  9. AnonymousJune 18, 2007 at 11:31 PM

    منوره يا هنود فى المدونه....

    اشوفك ان شاء الله فى فرح اخويا بإذن الله...



    شكرا جزيلا يا ابو الفداء على النصيحه....



    على رأيك يا فكره هما اللى جابوه لنفسهم,بس المغنيين دول مش متضررين فى حاجه هما زى المنشار طالع واكل نازل واكل...المهم ان الناس تسمع الاغنيه و تشوف الاعلانات اللى بتيجى بعد و قبل الاغنيه...



    منوره يا اسماء و الله....

    و الله يا بنتى انا لما ببقى مخلصه يوم بالوصف ده و اسمعها ببقى الحقيقه نفسى اسقف على وشهم....



    محمد عبد الجليل:

    انا مش بقول ان مصر وحشه قوى كده بس انا كنت فى اليوم بعمل البسبور بتاعى و شوفت كميه حاجات تخلى الحجر ينطق....

    فأكيد عمرى ساعتها ماكنت هكتب حاجات حلوه عن مصر....




    كااااااااااات:

    منوره يا حبى المدونه



    anonymous:

    انا مش عارفه انتوا الاتنين نفس الشخصيه ولا لأ...


    انا مش بكره مصر ده انا بموت فيها...

    و اكتر واحده ممكن تدافع و بكره جدا السفر برا مصر,لانى بطبق المثل اللى بيقول " من خرج من داره اتقل مقداره"

    و فعلا لو مش المكان هو اللى وحشنا كفايه اننا نسيب اهلنا و اصحابنا و نروح اماكن غريبه عننا...

    ReplyDelete
  10. The ManagerJune 19, 2007 at 3:06 AM

    والله مصر لسة حلوة

    دة عيب شخصيات معينة من الشعب ربنا يهديهم ويهدينا بيسئوا لمصر

    ReplyDelete